Yesuusi Tonaa Lame Soqqamaasine Doori

Yesuusi mitto dironna lee agana sabbaki gedensaanni, mitto lowo geeshsha hasiisanno coye assara hedino. Isi ledosi loossanno gede ayeoo doora ikka? Isi Kiristaanu songo massagganno gede qajeelsinori ayeooti? Yesuusi konne coye assate Yihowa kaaꞌlasira hasiꞌrino. Konni daafira, isi ilaala haꞌre callisi huuccatto assiꞌranni gali. Soodita Yesuusi rosaanosi gamba asse 12 soqqamaasine doori. Ati insa giddo ayeoo suꞌma qaagatto? Insa suꞌmi Pheexiroosi, Indiriyaasi, Yaiqoobi, Yohaannisi, Filiphoosi, Bertelemewoosi, Toomaasi, Maatewoosi, Ilfiyoosi beetti Yaiqoobi, Taadewoosi, Simiooninna Asqorootu Yihudaati.

Tonaa Lamunku Yesuusi ledo hadhannoreeti. Yesuusi insa qajeelsi gedensaanni, sabbakkanno gede soyino. Yihowa insara busha ayyaana fushshitannonna xiwamino manna hursitanno wolqa uyinonsa.

Yesuusi Tonaa Lamenka jaallaꞌya yee woshshannonsa, hattono insa ammanannonsa. Farisootaho, Yesuusi rosaano rossinokkirenna gari egenno noonsakki manna labbinonsa. Ikkollana, Yesuusi insa loosonsa danchu garinni loossanno gede qajeelsinonsa. Insa Yesuusi reyara albaanninna reyotenni kai gedensaanni ledosi heedhino. Yesuusi gede Tonaa Lamunku giddo rooru Galiilunni dagginoreeti. Insa giddo mitu seenne adhitinooreeti.

Yesuusi soqqamaasine guuta ikkitinokki daafira sodhino woyiti no. Insa muddante gara ikkinokkire coyidhinonna assitino woyiti no. Isinni insa, ‘Ninke giddo roorannohu ayeti?’ yite heewisantino. Ikkollana insa Yihowa baxxannoreetinna dancha mannaati. Yesuusi iimira haꞌri gedensaanni, insa Kiristaanu songora xinta ikkitino.