Insa Yesuusire Borreessitino

Koye misilete aana noo manna laitto?— Suꞌminsa Maatewoosi, Marqoosi, Luqaasi, Yohaannisi, Pheexiroosi, Yaaqoobi, Yihudaatinna Phaawuloosiiti. Insa baalunku Yesuusi uullate aana heeꞌri waro heedhinoreeti; qolteno isi xagge borreessitino. Hanni insare lende ronso.

Insa giddo sasu Yesuusi ledo sabbakkino hawaariyaateeti. Kuri sasu ayeootiro afootto?— Maatewoosi, Yohaannisinna Pheexiroosiiti. Hawaariya Maatewoosinna hawaariya Yohaannisi Yesuusa seekkite egentino; hakko daafira insa Yesuusi heeshshore kultanno maxaaffa borreessitino. Hawaariya Yohaannisi Ajuuja yinanni maxaafanna Umi Yohaannisi, Layinki Yohaannisinna Sayikki Yohaannisi yinanni dabdaabbuwano borreessino. Hawaariya Pheexiroosi qole Qullaawu Maxaafi giddo noota lame dabdaabbe borreessino. Tenne dabdaabbuwa Umi Pheexiroosinna Layinki Pheexiroosi yinanni. Pheexiroosi layinki dabdaabbesira, Yihowa iima heeꞌre Yesuusire togo yee coyiꞌrinota borreessino: ‘Kuni beettoꞌyaati. Isi baxeemmoho, hattono iso laeemmo wote tashshi yaannoe.’

Misilete aana leeltannori wolootuno, Yesuusire kultanno maxaaffa borreessitino. Kuri giddo mittu Marqoosiiti. Isi Yesuusa diinnasi amaddu wote bayichoho heeꞌrikki digatino, hakko daafira ikkinore baala laino. Wolu kayinni Luqaasiiti. Isi hakimichaho, isi Kiristaancho ikkinohu Yesuusi reyi gedensaanni ikkikki digatino.

Qullaawa Maxaafa borreessitinori wolootu misilete aana leeltannori, lame maaꞌnuulle Yesuusi roduuwaati. Ati suꞌmansa egennootto?— Suꞌminsa Yaaqoobiitinna Yihudaati. Insa umo Yesuusa diammantino. Isi macharaarinoha nafa lawinonsa. Gedenaanni higge kayinni Yesuusa ammante Kiristaana ikkitino.

Misilete aana noohu Qullaawa Maxaafa borreessinohu wolu kayinni Phaawuloosiiti. Isi Kiristaancho ikkara albaanni suꞌmisi Saaooliiti. Hakkawaro isi Kiristaana effire giwino daafira insa lowo geeshsha qarrisino. Phaawuloosi Kiristaancho ikkanno gede assinori maatiro afootto?— Mitte hige Phaawuloosi doogo haꞌranni heeꞌre hedeweelcho iiminni mitte huuro macciishshi. Hatti huuro Yesuusite! Isi Phaawuloosi, ‘Ane ammantannore togo qarrisattohu mayiraati?’ yee xaꞌmisi. Hakkuyi gedensaanni Phaawuloosi heeshshosi biddi assiꞌre Kiristaancho ikkino. Isi Qullaawu Maxaafita 14 maxaaffa borreessino; tini maxaaffa Roomu Sokkanni kayisse Ibiraawuyaani maxaafi geeshsha noote.

Qullaawa Maxaafa barru baala nabbawa hasiissannonke; dihattooti?— Qullaawa Maxaafa nabbambummoro Yesuusire lowo coye ronseemmo. Ati Yesuusire ledde rosa hasiꞌratto?—