Uullate Aana Heedhinore Jigeeyye Manna

MINEꞌNE noo heelliichcho geeshshihu hojjaameessu manchi atewa hige dayiro mayi macciishshamannohe? Togoo manchi jigeessaho! Mitte yannara uullate aana jigeeyye manni heeꞌrino. Qullaawu Maxaafi konni manni annuwa iiminni daggino sokkaanooti yaanno. Togoori hiitto ikke ikkara dandaanno?

Bushu sokkaanchi Sheexaanu ayee woteno bunshe assannota qaagi. Isi Maganu sokkaano nafa bushuulle ikkitanno gede assate woꞌnaalino. Yannate gedensaanni, gama sokkaano Sheexaanu yaannore macciishshitu. Maganu iima loossara uyinonsa looso agurtu. Hakkiinnino iiminni uullara dirrite mannu biso uddidhu. Togo assitinohu mayiraatiro afootto?

Tini Maganu ooso togo assitinohu uullate aana noore xumuulle meento laꞌe, insa ledo heeꞌrate hasidhinohuraati yee Qullaawu Maxaafi kulanno. Konni daafira tini sokkaano uullara dirrite konne meento adhitu. Qullaawu Maxaafi, konne assoote soꞌrote yaanno; korkaatuno Maganu, sokkaano kalaqinohu iima heedharaati.

Tini sokkaanonna mini amuwinsa ooso iltu wote, ilantino qaaqquulli baxxitinoreeti. Umi qara hakkeeshshi geeshsha baxxitinore dilabbanno. Ikkollana lophphituta jigeeyyenna wolqaataamma ikkitu.

Kuri jigeeyye mannooti bushuulleho. Lowo geeshsha jigeeyyenna wolqaataamma ikkitinohura, manna gawajjitanno. Mannu duuchchunku insa gede busha ikkanno gede giddeessitanno.

Heenooki reyino; ikkollana xaano uullate aana mittu danchu manchi no. Suꞌmisino Nohiiti. Kuni manchi ayee woteno Maganu baxannore assannoho.

Mitto barra Maganu busha manna baala gudanno yanna iillitinota Nohira kuli. Ikkollana Maganu Nohi, maatesinna batinynye saada gatisaraati. Hanni konne assannohu hiittoonniitiro laꞌno.