Kiꞌne Ledo Qullaawa Maxaafa Xiinxallummoro, Yihowa Farciꞌraasincho Ikka Hasiissannoe?
Deeꞌni, ikkatto gede murrisannohehu dino. Lowo miliyoone ikkanno manni songonke miila ikka hoogirono, ninke ledo Qullaawa Maxaafa xiinxalla baxanno.a Xiinxallote pirogiraame qixxeessinoonnihu, Qullaawu Maxaafi mayyaannoro huwatatto gede kaaꞌlateeti. Ninke ledo xiinxallite afiꞌratto egenno ma garinni horoonsiꞌrattoro doodhattohu kayinni ateeti. Ammana annu annu doodhanno coye ikkinota anfoommo.—Iyyaasu 24:15.
Xiinxallote yannara umiꞌyaha Qullaawa Maxaafa horoonsiꞌra dandeemmo?
Ee, dandaatto. Huwatate qarrisannokkiha Qullaawa Borrota Haaro Alame Tiro yinanniha Qullaawa Maxaafa horoonsiꞌra banxeemmohanna hasiꞌrittoro aterano mulla uyineemmoheha ikkirono, xiinxallinseemmohe woyite umikkiha Qullaawa Maxaafa horoonsiꞌrittoro qarru dino. Woꞌmanti Qullaawu Maxaafi tiro, Maganu Qaalita hexxotenna gatote sokka kultanno yaa dandiinanni.
Kiꞌnewa higa hasiꞌrannokki manna xiinxallissinannihu mayiraati?
Qaru korkaati, Maganu Yihowara noonke baxilleeti; Yihowa, Kiristaanu rosino coye wolootaho kulara hasiꞌranno. (Maatewoosi 22:37, 38; 28:19, 20) Mannu Maganu Qaali yaannore huwatanno gede kaaꞌline “Maganu ledo loonseemmore” ikkanke ninkera taalle nookki qoossooti.—1 Qorontoosi 3:6-9.
Qoleno olliichinkera noonke baxilli tenne assineemmo gede kakkayisannonke. (Maatewoosi 22:39) Maganu Qaalinni ronsoommoha dhagge ikkanno roso wolootaho kula hagiirsiissannonke.—Soqqamaasinete Looso 20:35.
a Lawishshaho, 2023nni aganu kiiro 7,281,212 ikkanno manna Qullaawa Maxaafa xiinxallinsoommo; kuri giddo haammatu manni mitteenni gamba yeenna xiinxallinsoommorino no. Ikkollana, hakko diro konni manni giddo cuuame Yihowa Farciꞌraasine ikkinohu 269,517 manna callaho.