Mereeri Soojjaatira Kaino Ola—Qullaawu Maxaafi Mayyaanno?

Alame Ameeriku, Israeeletenna Iraanete mereero kaino ola macciishshite yaaddanni no. Kuni oli hakkiinni sae halaꞌlakka? Gashshootubba shoonna reyo hoolte, alamenke keeru bayicho assitakka?

Qullaawu Maxaafi himana afino manni, Mereeri Soojjaatira kainohu kuni oli Ajuujate maxaafira kulloonnihu Armagedooni olira kaima ikkakka yee hedara dandaanno.

Qullaawu Maxaafi mayyaanno?

Gashshootubba Mereeri Soojjaatira kaino ola uurrissanno?

Qullaawu Maxaafi togo yaanno: “Mannu gatisara didandaannona, albisoota addaxxitinoonte.”—Faarso 146:3.

Gashshootubba Mereeri Soojjaatira araara kara dandiitannoronna teꞌee galle honsanni anfeemmota ikkitanno. Ikkollana, ola hoole uullate aana hegeraamo keere abba dandaannohu mittuno poletiku gashshaanchi, mittuno mannu gashshooti, woy mitteno mannu uurrinsha nookkita Qullaawu Maxaafi xawise kulanno. “Baattote qacce geeshsha nooha ola uurrisa” dandaannohu Magano callaho.—Faarso 46:9.

• Ledde mashalaqqe afiꞌrate, “Olu Uurranno​—Mamaro?” yitannota Agarooshshu Shae metseete nabbawi.

Mereeri Soojjaatira kaino oli masaalotenni kulloonniho?

Qullaawu Maxaafi togo yaanno: “Olu luulonna olu duduwo macciishshitinanni. . . . Daga dagate aana, gashshootuno gashshootu aana ola kayisanno.”—Maatewoosi 24:6, 7.

Xa Mereeri Soojjaatira kae noo oli “alamete gumulora” heeꞌnoommota leellishanno malaati giddo mittoho; Qullaawu Maxaafi tenne yanna “goofimarchu barruwa” yeeno woshshanno. (Maatewoosi 24:3; 2 Ximootewoosi 3:1) Xaa yannara noo olinna gaanci, Maganu muli yannara ola uurrisate qaafo adhannotanna mannaho shetto ikkinoha wole qarra baala hoolannota leellishanno.

• Ledde afate, “‘Goofimarchu Barri’ Woy Yanna Malaati Maati?” yaanno birxicho nabbawi.

Armagedooni hanafannohu Mereeri Soojjaatiraati?

Qullaawu Maxaafi togo yaanno: “Battete ayyaannano mootoolla gamba assite Ibiraawootu afiinni, ‘Armagedooni’ yinanni darga xaadissu.”—Yohaannisi Ajuuja 16:16.

Armagedooni oli Mereeri Soojjaatira mannu gashshooti mereero kaꞌꞌanno ola diꞌꞌikkino. Hatteentenni, uullate gashshooti baalunna Maganu mereero kaꞌꞌannoho alame woꞌmate olaati.

• Ledde mashalaqqe afiꞌrate, “Armagedooni Oli Maati?” yaanno birxicho nabbawi.

Yaandeemmo woyte wodanaaꞌmineemmo gede kaaꞌlannonkeri maati?

Qullaawu Maxaafi togo yaanno: “Mittu coyirano yaaddinoonte; hatteentenni baalunku coyira huuccattotenninna eeggifatatenni galatu ledo huuccattoꞌne Maganoho shiqishidhe.”—Filiphisiyusi 4:6.

Maganu Yihowaa iso huucciꞌneemmo gede koysinonke. Maganu ninkere malanno daafira, huuccattonke macciishshe yaaddote yannara wodanaaꞌmineemmo gede kaaꞌlannonke. (1 Pheexiroosi 5:7) Tenne assanno doogga giddo mitte, olu batiꞌrino korkaata kula calla ikkikkinni olu uurrannohu hiittoonniitironna olu abbino gawajjo sissanno gara kulate.—Yohaannisi Ajuuja 21:3, 4.

• Maganu kaaꞌlannonke gara ledde afate, “Qullaawa Maxaafa Nabbawummoro Sheshifachishannore Afiꞌreemmo?” yaanno birxicho nabbawi.