Alamete Oli Gatannokki Coyeeti?—Qullaawu Maxaafi Mayyaanno?

Saihu 30 diri giddo, batinyu manni addi addi gobbuwa mereero noo aante roore seekkanni daggino yee hedino. Ikkollana, muli dirra kawa ikkanni noori hatto yine heda dandiinannikkita leellishanno.

• “Israeelenna Hizboolu Libaanoosi dannira olama hanaffuta, mannu kuni Gaaza kaino oli halaꞌle wole gobbano iillara dandaanno yee yaadanno.”—Royiters, Arfaasa 6, 2024.

• “Iraani anga nooti duucha gaamo addi addi bayicho ola kayissino; qoleno Iraani hedeweelcho niyukileerete massaara wirro seekkiꞌra hanaffino. Qoleno xa Ruusiyunna Chayinu Iraanira badhe ikkite no; tini qolte galchimi gobbuwara yaaddo kalaqqino.”—Ze Niwu Yoorki Taymis, Arfaasa 7, 2024.

• “Ruusiyu xaano Yukireene qasanna beebba assiꞌra diagurino.”—UN News, Arfaasa 11, 2024.

• “Chayinu miinjunninna olantote wolqanni lophanni noo gari, Tayiwaane gobbansanni naaxxitanno garinna Chayinunna Ameeriku godowa seya hoogansa gaancu kaꞌꞌanno gede assitara dandiitanno.”—Ze Jaappaan Taymis, Arfaasa 9, 2024.

Xaa yannara alamete aana duucha bayicho noo gaanci daafira Qullaawu Maxaafi yaannori no? Togoo gaanci alamete oli kaꞌꞌanno gede assakka?

Xa ikkanni noore Qullaawu Maxaafi giddo himannoonni

Yannankera ikkanni noo oli giddo mittono Qullaawu Maxaafi giddo bande dikulloonni. Ikkollana yannankera base baalate kae “gobbate aaninni keere [hunanni]” noo oli daafira himannoonni.—Yohaannisi Ajuuja 6:4.

Daanieeli maxaafi, “goofimarchu iillanno woyite” mimmitu ledo heewisantanno mangistubba kuꞌu koꞌoye roorate ‘qasantannota’ woy mimmito xiibbannota kulanno. Insa qasantanno woyite, jawa olantote wolqa noonsata leellishshanno hattono lowoha “ayirrado coye” yaano woxe fushshitanno.—Daanieeli 11:40, 42, 43.

Muli yannara kaꞌꞌanno ola

Qullaawu Maxaafi kulanno garinni, alame woyyaabbara albaanni balaxxe anganni fultanno. Yesuusi masaalino garinni, “alamete hanafonni kayise xaa geeshsha daye egenninokkihu, layinkimeeshshono daannokkihu quuxxote qarri daanno.” (Maatewoosi 24:21) Konni “quuxxote qarri” gumulora Armagedooni yinanni oli kaꞌꞌanno; konne ola ‘Woꞌmanka Dandaanno Maganihu batiꞌru barri ola’ yinoonni.​—Yohaannisi Ajuuja 16:14, 16.

Ikkollana, Armagedooni mannu sircho gudannoha ikkikkinni gatisanno olaati. Konni oli widoonni Maganu, lowo manna gudino ola kayisinoha mannu gashshoote baala hunanno. Armagedooni geedanno keere abbanno gara afate, aante noo birxichuwa nabbawi:

• “Armagedooni Oli Maati?”

• “Armagedooni Quqquxamme Agadhineemmo!”