Moollenna Oola—Qullaawu Maxaafi Mayyaanno?

• “Chayinu mangiste, tayixe gobbansara iibbillu ‘quwa sainotanna’ konni albaanni hattee gobbara moolle batidhino arri giddo kuni sayikkiha ikkinota xawissino.”—Ze Gaardiyani, Wocawaaro 7, 2022.

• “Afirikaho mite gobbara moolle ubbunku tayixe onte dirooti; tini moolle xaano suffannote.”—UN News, Woxawaajje 26, 2022.

• “Awuroppu gobbuwa giddo darate ale ikkitannota moolle gantanno yine hendanni; dagganni noo moolle 500 diri giddo anfe egenninoonnikkita ikkitukki digattanno.”—BBC News, Woxawaajje 23, 2022.

Batinye xiinxallaano, togoo moollenna ooli uurrannokkitanna roorenka lexxanni haꞌrannota kultanni no. Ikkina woyyitino yanna dagganno yine hexxa dandiinanni? Qullaawu Maxaafi tenne daafira mayyaanno?

Moollenna Qullaawu Maxaafi Himana

Qullaawu Maxaafi giddo dirinke daafira togo yine himannoonni:

• “Addi addi darga hude . . . ikkanno.”—Maatewoosi 24:7.

Moollenna oolu roore woyite hude abbanno. Hudenna hude abbitanno qarrinna reyo Qullaawu Maxaafi himani woꞌmanno gede assitanni no.—Yohaannisi Ajuuja 6:6, 8.

Moolle lexxitanni hadhanni noohu mayiraati?

Qullaawu Maxaafi, moolle lexxitanno gede assinohu qaru coyi maatiro kulanno. Togo yaanno:

• “Mannu heeshsho angasi nookkitanna, haꞌrinshosino mannu umisi qineessiꞌre dandaannokkita afoommo.”—Ermiyaasi 10:23.

Hatto yaa mannu ooso ‘haꞌrinshonsa qineessiꞌra’ woy insaneeto danchu garinni gashsha didandiitanno yaate. Insa adhitannoti gara ikkitinokki qaafo duucha woyite moollenna wayi anje abbitanno.

• Rooru sayinsete egennaammi, mannu ooso assitannori alame woꞌmate ayyarete gade soorrantanno gede assinotanna konninni kainohunni baalankawa moolle lexxitinota kultanno.

• Hafuuraamu manni assannorinna gaꞌata hendikki fushshinanni wodho, dubbu dolame goofanno gede, ayyare daafantanno gedenna kalaqamu jiro afimaltanno gede assitino; konninni kainohunni lowo geeshsha hasiisannonke waa hoongammora dandiineemmo.

Ikkollana, Qullaawu Maxaafi hexxo noonketa kulanno.

Dancha yanna dagganno yine hexxa dandiineemmo?

Qullaawu Maxaafi, Maganu yannankera nooha wayi qarra tirannota kulanno. Hiisse?

1. 1. Maganu “baatto huntannore [hunanno].” (Yohaannisi Ajuuja 11:18) Isi kalaqamu jiro daafannore assannoha hafuuraamonna busha manna hunanno; wayi qarri heeꞌranno gede assinohu mittu kori insaati.—2 Ximootewoosi 3:1, 2.

2. 2. “Iibbe itanno shaafi kofame ikkanno; moola baattora buicho burqitanno.” (Isayaasi 35:1, 6, 7) Maganu moolle abbitino gawajjo hoole, baatto waa duubbino gannate ikkitanno gede assanno.

3. 3. “Xeena uyite baatto towatootto; lowo geeshshano qawaaxxisootto.” (Faarso 65:9) Maganu atootesi dirrisanno daafira, albillitte baattote aana woꞌmunkura ikkitannoti falakkinoti dancha sagalenna xalalu wayi woꞌmanno.