Yesuusi Saawuli Doori

Saawuli Roomaho Xersesi yinanniwa ilamino. Isi Ayihudete Seera seekke rosino Farisichaati; qoleno Kiristaana lowo geeshsha giwanno. Isi Kiristaana ikkino meentonna labballo, mininsanni haaꞌre haꞌre usuranno. Wole agurina mannu Isxifaanoosi kinnatenni gane shii yannara isi uurre laꞌꞌanni no.

Ikkollana, Saawuli Yerusaalamete heeꞌranno Kiristaana calla ikkikkinni wolewa heeꞌranno Kiristaanano usura hasiꞌrino. Konnira Demaasqote heeꞌranno Kiristaana usuranno gede fajjasira, kakkalaanote biilo xaꞌmiꞌri. Saawuli Demaasqote katama iillara rahe heeꞌreenna, bilicci yaanno xawaabbi doyisseennasi uulla uwi. Hakkiinni ‘Saawuli, mayira qarrissattoe?’ yitanno huuro macciishshi. Saawuli qole, “Ati ayeti?” yee xaꞌmi. Hakkiinni, ‘Ani Yesuusaati. Xa kaꞌe Demaasqo haꞌri; assattore hakko kullannihena’ yiisi. Hatte yannara Saawuli ille ballino daafira, mannu massage Demaasqo massisi.

Demaasqote Hanaaniya yinannihu ammanamino Kiristaanchi no. Yesuusi ajuujatenni isira togo yiisi: ‘Suwashsho yinanni doogo widoonni higge Yihuda yinanni manchi minira haꞌri; hakkiicho Saawuli yinanni mancho xaꞌmisiisi.’ Hanaaniya, ‘Mooticha, hakku manchi rosaanokki usurannoha ikkinota macciishshoommo!’ yii. Yesuusi kayinni ‘Saawuli dancha duduwo lowo dagara duduwanno gede doodhoommohona isiwa haꞌri’ yii.

Konni daafira, Hanaaniya Saawuli noowa mare, ‘Rodooꞌya Saawuli, Yesuusi illekki fanammora soyinoe’ yiisi. Bayichonko Saawulira illesi faꞌnantu. Hakkiinni isi Yesuusi daafira rose harunsaanchosi ikkino. Saawuli cuuame Kiristaancho ikke wolu Kiristaani ledo xaadu mine sabbaka hanafi. Ayihude Saawuli mannaho Yesuusi daafira rosiisanna laꞌe mageeshshi geeshsha maalaꞌlitinoha lawannohe? Insa ‘Kuni manchi Yesuusi rosaano qarrisannoha diꞌꞌikkino?’ yitino.

Saawuli sase diro woꞌma Demaasqote heeꞌranno mannira sabbakino. Ayihude Saawuli gibbino daafira shitara mixidhino. Ikkollana roduuwu tenne macciishshite, katamunni fule haꞌranno gede assitinosi. Insa iso gimboolaho worte, huxxu xullo giddoonni qolte dirrissinosi.

Saawuli Yerusaalame iilliti, hakko heeꞌranno roduuwinni xaadi. Ikkollana insa iso waajjitino. Barnabaasi yinannihu shaqqadu rosaanchi, Saawuli soqqamaasinenniwa masse, isi bashsho gede busha mancho ikkinokkita kulinsa. Hakkiinni Saawuli, Yerusaalamete noo songo ledo dancha duduwo diinaggaawe sabbakino. Yannate gedensaanni suꞌmasi Phaawuloosi yinoonni.