Yesuusi Lowo Maalale Loosi

Yesuusi uullara dayinohu Maganu Mangisteha dancha duduwo duduwaraati. Yesuusi Moote ikkanno woyite assannore leellishate, Yihowa isira maalale loosanno gede qullaawa ayyaana uyinosi. Isi hursa dandiinokki dhibbi dino. Yesuusi mariwa baalawa mannu hursannonsa gede huucciꞌranno; isino baalanka hursino. Ballootu laꞌanno gede, macciweelootu macciishshitanno gede assino; qoleno laanshaabbinore hursino, hattono busha ayyaana fushshino. Mitu manni isinni Yesuusi uddano calla kise hurino. Mannu Yesuusi haꞌriwa baala hoodesi haꞌrino. Isi callisi heeꞌra hasiꞌranno woyite nafa, mannu isiwa daannota dihoolino.

Mitto barra mannu laanshaawino mancho Yesuusiwa abbi. Ikkollana, mannu batiꞌrino daafira minira ea didandiitino. Konni daafira mineho iimiido murte hakkonne mancho Yesuusi noowa dirrissu. Hakkiinni Yesuusi mancho, ‘Kaꞌe haꞌri’ yiisi. Manchu kae haꞌrita, hakko noo manni dhagge assiꞌrino.

Wole yannarano, Yesuusi mittu qachira heeꞌreenna, dhiigu amadinonsari tonnu manni xeertote heedhe, ‘Yesuusa, kaaꞌlinke ballo’ yite raartu. Hatte yannara, dhiigu amadinonsari mannunniwa gamba yaa didandiitanno. Yesuusi dhiigu amadinonsari qullaawu minira hadhanno gede kulinsa; Yihowa Seeri garinni dhiigu amadinosi manchi huriro hatto assa hasiissannosi. Hadhanni heedhe xibbinsanni hurtu. Dhiigu amadinonsari giddo mittu xibbisinni hurinota afiti, Yesuusa galataranna Magano guwisiꞌrara agure higino. Tonnunku giddo Yesuusa galatinohu mitto callaho.

Mitte 12 diro dhibbu waadannase heedhino mancho xibbisenni hura lowo geeshsha hasidhino. Ise Yesuusi lowo manni ledo haꞌranni heeꞌreenna, badhesiinni higge dagge uddanosi qacce kissu. Hakkawoyintenni, ise xibbisenni hurtu. Hatte yannara Yesuusi, “Kisiehu ayeti?” yee xaꞌmi. Mancho lowo geeshsha waajjitino; ikkirono ise albasiinni dagge assitinore kultusi. Yesuusi, ‘Beettoꞌya, keerunni haꞌri’ yee sheshifachishinose.

Iyairoosi yinanni roorrichi Yesuusiwa daye, ‘Qaaqqoꞌya lowo geeshsha xiwantinona, miniꞌyara kai ballo’ yee huucciꞌri. Ikkollana, Yesuusi Iyairoosi minira iillikki qaaqqo reyitu. Yesuusi maranno woyite, lowo manni ayiddise ledo wiꞌlanni no. Yesuusi insa, ‘Qaaqqo goxxella noona wiꞌlitinoonte’ yii. Yesuusi qaaqqote anga amade, ‘Tee qaaqqo, gotti yii’ yiino. Bayichonko qaaqqo kaꞌe ofoltu; hakkiinni Yesuusi annasenna amase, ‘Ittannore uyiyyese’ yii. Hakkawoyite qaaqqote anninna ama mageeshshi geeshsha hagiidhinoha lawannohe?