XAꞌMO 5

Rosu Mine Ooso Qarrissannoe Wote Ma Asso?

TENNE AFA MAYIRA HASIISSU?

Ooso waajjishiishshannohe wote assattori, coye seekkara woy hunara dandaanno.

ATE IKKOOTTORO MA ASSATTO?

Hanni tenne ikkito hedi: Toomaasi techo rosu minira haꞌra dibaxino. Isinni layinkita rosu minira dihaꞌreemmo yaate geeshsha nafa iillino. Sasu agani albaanni, rosu mine ooso Toomaasi daafira nookkire coyidhe suꞌmasi huntu. Hakkiinni isira busha suꞌma fushshitusi. Mito wote affinokkiha labbe Toomaasi anganni daftarrasi gante billaallissanno; woy badheenni higge dagge alba qolte tuggeennasi caaqqi yaanno wote, ‘Ayi tugihero dianfoommo’ yitanno. Bero isinni Toomaasi dagoomittete webisayite widoonni sokka sokke baasa waajjishiishshino . . .

Ati Toomaasi ikkoottoro ma assatto?

WODANAAꞌMITE HEDI!

Tennera assa dandaattori dino yaa diꞌꞌikkino! Isinni ganamittokki qeela dandaatto. Hiittoonni?

GIIRANTOOTI. Qullaawu Maxaafi togo yaanno: “Gowwu manchi hanqosi gudise leellishanno; egennaamu kayinni aarasi [woy, hanqosi] cincatenni sayisanno.” (Lawishsha 29:11) Hanqoho muddama hoogittoro woy hanqoottota leellishiꞌra hoogittoro, qarrissannohe ooso ceeꞌmite agurtara dandiitanno.
BADO QOꞌLITOOTI. Qullaawu Maxaafi togo yaanno: “Busha assinohehura busha assite qoltooti.” (Roomu Sokka 12:17) Bado qoꞌla coyi roore bushanno gede assitanno ikkinnina kaaꞌlitannori dino.
QARRU GIDDORA EESSANNOHE COYIWIINNI XEERTIꞌRI. Qullaawu Maxaafi togo yaanno: “Egennaamu manchi bushare afiro maaxamanno.” (Lawishsha 22:3) Dandaamihe deerrinni, manna hasiissanno ooso ledo xaaddooti woy hattoo ooso qarrissannohe gede assanno coye hooꞌli.
HEDDINOKKI GARINNI QOLI. Qullaawu Maxaafi togo yaanno: “Shaqqadu arrawi hanqo qiissanno.” (Lawishsha 15:1) Insa haariinte nafa saꞌꞌa dandaatto. Lawishshaho, ooso duꞌmillekki laꞌe haariintuhero, muushshi yite ‘Hattee wote garaho; shiima geeshsha shaaloommoro danchaho!’ yaa dandaatto.
INSAWIINNI AGURTE HAꞌRI. Noora yinanniti 19 diri beetto togo yitino: “Sammi yite agurte haꞌrakki, hasiisanni qarrisannohe manchinni roore gikki yoottohanna worba ikkoottota leellishshanno. Hatto assakki ateneeto qeeꞌla dandaattota leellishshanno; qarrisannohe beetti kayinni tenne assa didandaanno.”—2 Ximootewoosi 2:24.
HUXUXXI YITOOTI. Hasiissanni qarrissanno ooso huxuxxi yitannorenna umo heeshshi yitannore badde affanno. Kayinni sammi yite wodhatto gedeeha ikkoottokkita laꞌuro ate seyata waajjitanno.
MANNAHO KUꞌLI. Alba rosiisaancho ikkite loossinoti mitte mancho togo yitino: “Mannu waajjishiishanni qarrisannori baalu woleho kuꞌla hasiissannonsa yee hedeemma. Hatto assansa garaho; qoleno, waajjishiishshannori wolootano qarrissannokki gede assate kaaꞌlitanno.”

Wedellichu beetti qarrisannosihu albaanni waajjikkinni uurre no — Huxuxxi yaa hoogakki waajjishiishshannohe ooso afidhinokki jawaante afiꞌratto gede kaaꞌlitannohe

ATI TENNE AFOOTTO?

Qarrisa gana calla diꞌꞌikkitino; aane noorino qarrisate widira gaamamanno:

Bushare coyiꞌne iilla. “Ooso fushshitinoe suꞌmuwanna yite xontinoere horo dihaweemma. Insa ani waagiweelote, caaqqi yine laꞌnanniekkitenna tidhoommakkite yee hedeemma gede assitinoe. Hatteentenni gantoommeꞌꞌero woyyate.” —Seliini, 20 diriti.
Gambo hoola. “Rosu mine ledoꞌya rossanno ooso callachishshue. Insa ledonsa ofolleemmata hoolate yite, sagale intanniwa ofollinanni bayichi amadame goofinoha lawissanno. Diro woꞌma sagale callaꞌya itanninna wiꞌlanni sayisoomma.”—Heeli, 18 diriti.
Interneetete woy wolu xaadooshshu buusi widoonni qarrisa. “Kompiyuterete aana boodere calla assine mannu suꞌma huna, wole agurina mittu manchi heeshsho gara baꞌanno gede assa dandiinanni. Togo yaa coye iibbisha labbara dandiitanno; kayinni kuni ikkara dandaannoreeti.”—Daanieeli, 14 dirihu.

**Qarrissanno Ooso—xaꞌmuwa**
ADDAHONSO XARAHO?	DAWARO
1 Manna qarrisa lowo kumi diri albaannino noote.	1 Addaho. Lawishshaho, Qullaawu Maxaafi alba Nefiliimi yinanni manni noota kulanno; suꞌminsa tiro, ‘Haadhe Uullate Gantannore’ yaate.—Kalaqama 6:4.
2 Manna qarrisa haariimotella ikkinnina gawajjitannori dino.	2 Xaraho. Batinyu wedelli insaneeto shaanno gede assanno coyi giddo mittu wolu manni waajjishiishannonsa daafiraati.
3 Qarrinsannitanna seyanyoote hooꞌlate ganama woyyitanno.	3 Xaraho. Waajjishiishshannonkeri roore wote wolqa ninke roortanno; hakko daafira bado qoꞌlate kaꞌꞌa kaaꞌlitannori dino.
4 Manna waajjishiinshanna anfiro anfoonnikkihu gede ikkine sae haꞌra danchate.	4 Xaraho. Togoo wote, anfoonnikkiha lambe saꞌꞌa digaraho. Mitto beetto ooso qarrissanni heedheenna sammi yite saꞌꞌattoha ikkiro, qarra tirate assoottori nookki daafira kuni qarri lexxanno gede assootto yaa dandiinanni.
5 Qarrissannori fenjeejjite coyidhannoha ikkirono, insano beꞌe yitannokkire diꞌꞌikkitino.	5 Addaho. Manna qarrissannori giddo mitootu insaneeto gotti gotti assitannoha ikkirono, batinyu kayinni insaneeto ajishshe laꞌanno; isinni woloota mishshannohu tenne hedonsa qeeꞌlate yiteeti.
6 Manna waajjishiishshannori woyyaabbe danchuulle ikkitara dandiitanno.	6 Addaho. Manna waajjishiishshannori amaallinsaro hedonsanna assootensa biddi assidhara dandiitanno.