Reyitiyori Mayi Garinni No?

Reyo heeshshote gurchooti. Reyo takkinaatu goxichi gedeeti. (Yohaannisi 11:11-14) Reyitiyori macciishsha, laꞌꞌa, coyiꞌra woy mittoreno wodancha didandiitanno. (Mekibibi 9:5, 10) Kaphu ammaꞌna mannu reyiro wolu dani heeshsho heeꞌrate iimira haꞌranno yite rosiissanno. Qullaawu Maxaafi kayinni hatto yee dirosiisanno.

Reyino manni kaaꞌlankerano ikko gawajjankera didandaanno. Reyitiyore hagiirsiissannoha laweenna annaho xorshiꞌranna reyitiyorira kakkalo shiqisha duucha basera rosaminoreeti. Kuni assooti Sheexaanu kaphi aana xintaminoha ikkinohura Magano dihagiirsiisanno. Reyitiyoreno ikkiro dihagiirsiisanno, korkaatuno insa heeshsho noonsakkireeti. Reyitiyore waajjano ikko magansiꞌra dihasiissannonke. Magansiꞌra hasiissannonkehu Magano callaho.—Maatewoosi 4:10.

Reyitiyori galagalte heeshshote heedhanno. Yihowa reyitiyore galagalte gannate ikkitanno uullara heedhanno gede kayisannonsa. (Yohaannisi 5:28, 29; Soqqamaanote Looso 24:15) Kuni ikkannohu albiraati. Mitto goxino mancho woshshite baqqi assattonte gede, Maganuno reyitiyore hatto asse kayisa dandaanno.—Maarqoosi 5:22, 23, 41, 42.

Direyineemmo yitanno hedo Sheexaanu Daawuloosi halashshino kaphooti. Sheexaanunna durriissasi reyino manni ayyaani heeshshonniha ikke sufanno, mannu aana xissonna wole qarra iillishanno yee mannu ammananno gede assitino. Sheexaanu manna mito wote haaqetenna ajuujatenni soꞌrisiisanno. Bushu ayyaani ragaanni higge reyitiyori ledo hasaabbannore Yihowa giwanno.—Marro 18:10-12.