Ikke Sainorinni Roso Afiꞌre Qoropha

Yihowa bushu manni gannate hunara difajjannonsa. Hakkiicho isi jaalla calla heedhanno. Bushuullu ma ikkitanno? Dawaro afiꞌrate, Nohita halaalaancho xagge laꞌno. Nohi heeꞌrinohu seedu diri albaanniiti. Dancha mancho ikkinohura heeshshosi diro woꞌma Yihowa fajjo assate sharramino. Hatte yannara noohu wolu manni kayinni bunshe loossannoreeti. Konni daafira Yihowa lolaho abbe busha manna baala hunannota Nohira kulisi. Hattono konni lolahinni Nohinna maatesi baꞌannokki gede markaawe qixxeessara kulisi.—Kalaqo 6:9-18.

Nohinna maatesi markaawe qixxeessitu. Nohi lolahu daannohura mannu qorophanno gede kulirono, dimacciishshitinosi. Bunshe loosansa diagurtino. Nohi markaawe qixxeesse kai gedensaanni babbaxxitino saadanna gaxigalla markaawete giddora eessi, hattono isinna maatesi markaawete giddora eꞌu. Hakkunni gedensaanni Yihowa biitete xeena dirrisi. Konne xeenano 40 barranna 40 hashsha gani. Lolahuno uullate aana noore baala egemmi.—Kalaqo 7:7-12.

Bunshe woꞌmitino manni heeshshonsa hooggu, Nohinna maatesi kayinni gattu. Yihowa Nohinna maatesi baotenni gatisensa bushuullu nookki uullara heedhanno gede assinonsa. (Kalaqo 7:22, 23) Qullaawu Maxaafi Yihowa suwinorenna dancha ikkinore assitannokkire galagale hunanno yanna dagganno yaanno. Danchare assitannori dibaꞌanno. Gannate ikkitanno uullara hegerera heedhanno.—2 Pheexiroosi 2:5, 6, 9.

Yannankera batinyu manni bunshe assanno. Alamete aana qarru woꞌmino. Yihowa marro marro hige farciꞌraasinesi mannu qorophanno gede soyirono, rooru manni Qaalesi macciishsha dihasiꞌrino. Bunshete doogonsanni higa dihasidhino. Maganu bushunna danchu hiikkonneetiro bade kulinore macciishsha dihasidhino. Konni mannira mayi iillannonsa? Barruyi mitto barra soorranta ikka? Batinyu disoorrantanno. Bunshe woꞌmitinori baꞌannotinna galagalte heedhannokkiti yanna dagganno.—Faarso 92:7.

Uulla dibaꞌanno; hatteentenni gannate ikkitanno. Maganu jaalla ikkitannori baalu gannate ikkitanno uullara hegerera heedhanno.—Faarso 37:29.