Uulla Gannate Ikkitanno Yanna Mule No!

Yannankera uullate aana nooti busha ikkito, uulla gannate ikkitanno yanna mule noota leellishshanno. Qullaawu Maxaafi tini uulla gannate ikkitara albaanni qarrissanno yanna heedhannota kulanno. Xa heeꞌnoommohu hattee yanna giddooti! Qullaawu Maxaafi ikkanno yiinori giddo mito mito laꞌno:

Lowo oli. “Gosa gosate aana gashshootu gashshootu aana ola kayisanno.” (Maatewoosi 24:7) Tini masaalo woꞌmitino. Lamu alamete doyichcho olinninna shiimmaaddu olinni 1914 hanafe miliyoonete kiirranni manni goofino.

Xissote halaꞌla. ‘Woꞌma bayicho kakkadiishshu xibba ikkanno.’ (Luqaasi 21:11) Tini masaalona woꞌmitino? Ee woꞌmitino. Kaansere, wodanu xisso, shombu baalaami, shekkeere, Eediisi xiwaninna wolu dhibbi lowo miliyoone ikkanno manna gudino.

Hude. Alamete doyichora rooru manni itannota ikkado sagale diafiꞌrino. Miliyoonete kiirranni manni diru dirunkunni hudete kainohunni reyanno. Kunino uulla muli yanna giddo gannate ikkitannota leellishanno malaateeti. Qullaawu Maxaafi ‘Addi addi darga hudeno ikkanno’ yaanno.—Maarqoosi 13:8.

Uullate huxano. ‘Addi addi darga baattono milli yitanno.’ (Maatewoosi 24:7) Kunino yannankera ikkinoreeti. Uullate huxanonni 1914 hanafe mitte miliyoone saino manni goofino.

Bunshe woꞌmitino manni. Mannu ‘umonsa baxxannore ikkannonna woxe baxxannore, Maganunni roorsite jiro baxxannore ikkitanno.’ Ooso ‘iltinonsarira hajajantannokkire’ ikkitanno. (2 Ximootewosi 3:1-5) Yannankera duuchu manni togoo akati noosiho yiniro sumuu diyaatto? Maganoho ayirrinyu dinonsa, hattono Maganunnire rosate woꞌnaaltannore qarrissanno.

Jaddo. Ledeno “Bunshete batinyi” ikkanno. (Maatewoosi 24:12) Jaddo saꞌu dirranni roore yannankera baasa ikkitino yiniro sumuu yiittokki digatatto. Ayewano heeꞌranno manni woxe mulqamara, dogamaranna gawajjamara dandaanno.

Kuni duuchunkuri Maganu gashshooti daa rahinota leellishanno. Qullaawu Maxaafi: “Kuni coyi ikkanna laꞌiniro Maganu gashshooti gamba yinota egentinanni” yaanno. (Luqaasi 21:31) Maganu gashshooti yaa mayyaate? Tenne uulla gannate assannoho iimi gashshooteeti. Mannu gashshooti Maganu gashshootinni riqiwamanno.—Daanieeli 2:44.