Yesuusi Ejedhete Ilaalira

YESUUSI koye Ejedhete ilaalira no. Ledosi noori shoolu mannooti hawaariyaatesiiti. Insano roduuwu Indiriyaasinna Pheexiroosi, hattono roduuwu Yaaqoobinna Yohaannisiiti. Kuuꞌꞌu xeertote leellannohu Yerusaalamete nooho Maganu mineeti.

Yesuusi harrichchote darmichcho gulufe Yerusaalame haꞌrinku lamu barri saino. Hakko barri Maakisanynyote. Konne barra soodo Yesuusi Maganu minira mare no. Hakko heeꞌreenna kakkalaano amadde shitasira hasidhu. Ikkollana Yesuusa mannu baxannosi daafira shaa waajjitu.

Yesuusi tenne ammaꞌnote cimeeyye, ‘Kiꞌne hamasunna buutete ooso!’ yiinsa. Hakkiinnino assitino bunshe baalate Maganu qorichchishannonsata kulinsa. Hakkunni gedensaanni Yesuusi Ejedhete ilaala giddi; hakkiinnino kuri shoolu hawaariyaatesi xaꞌmo xaꞌmitusi. Hawaariyaatesi marichcho xaꞌmitinosiro afootto?

Xaꞌmitinosihu konni albira ikkannoreeti. Hawaariyaatesi Yesuusi uullate aana noo bunshe baala hoolannota affino. Ikkollana mamaro hoolannoro afa hasidhino. Yesuusi nugusa ikke gashshate galagale daannohu mamarooti?

Yesuusi galagale daanno wote uulla noo rosaanosi laꞌasira dandiitannokkita afino. Korkaatuno isi iima heeꞌranno daafira dileellannonsa. Konni daafira Yesuusi iima nugusa ikke gashshanno yannara uullate aana ikkannore mito mito coye hawaariyaatesira kulinsa. Kulinonsari giddo gamu maati?

Yesuusi goofate oli ikkannota, lowo manni xiwamannotanna hudirannota coyiꞌrino; hattono bunshe batidhannotanna, uulla lowo geeshsha huxidhannota kulino. Qoleno Yesuusi, Maganu mangistehu danchu duduwi gobba baalate duduwamannota coyꞌrino. Yannankera kuni coyi ikkanna laꞌnoommo? Ee laꞌnoommo! Konni daafira Yesuusi xa iima heeꞌre gashshanni noota dihuluullammeemmo. Isi muli yanna giddo uullate aana noo bunshe baala hoolanno.