Yoonaasinna Jawa Qulxuꞌmichcho

WAYI giddo noo mancho lai. Kuni manchi dilowo qarri giddo no? Qulxuꞌmichcho iso egemmitaraati! Isi ayeetiro afootto? Suꞌmisi Yoonaasiiti. Isi togoo qarri aana uwinohu hiitto ikkeetiro hanni laꞌno.

Yoonaasi Yihowa masaalaanchooti. Masaalaanchu Elsai reyihunni shiima yanna gedensaanni, Yihowa Yoonaasi togo yiisi: ‘Nennewete katama haꞌri. Hakko noo manni bunshe batidhino daafira, marte bunshensa kulinsa.’

Yoonaasi kayinni Yihowa soyinosiwa haꞌra dibaxino. Konni daafira Nennewe agure wole raga hadhanno yowolo gidde xooqi. Yihowa, Yoonaasi xooqinohura dihagiidhino. Konni daafira baaru aana dambalu kaꞌꞌanno gede assi. Wayi yowolo itara kaino daafira coyi bushanni haꞌri. Yowolote aana loossannori lowo geeshsha waajjitino daafira, kaaꞌlitannonsa gede magannansawa raartu.

Gedensaanni Yoonaasi mannootaho, ‘Ani iimanna uulla kalaqino Magano Yihowa magansiꞌreemmoho. Xa Yihowa assi yiinoere giwe xooqanni noommo’ yee kulinsa. Insano, ‘Dambalu uurranno gede hiissinoheyya?’ yite xaꞌmitusi.

Yoonaasino, ‘Baaru giddora tuggeꞌꞌe; baaruno sammi yaannona’ yiinsa. Yowolote aana loossannori Yoonaasi baaru giddora tuga dihasidhino; dambalu lexxanni haꞌrita kayinni fushshite tuggusi. Hakkawotenni dambalu uurri; baaruno sammi yii.

Yoonaasi wayi giddora lixanni heeꞌreenna, jawa qulxuꞌmichcho egemmitusi. Ikkeennano Yoonaasi direyino. Sase barranna sase hashsha hatte qulxuꞌmichcho godowira keeshshi. Yoonaasi Yihowara hajajame Nennewe haꞌra hoogasinni lowo geeshsha dadilli. Konni daafira maa assinoro afootto?

Yoonaasi Yihowa kaaꞌlannosi gede huucciꞌri. Hakkiinnino Yihowa, qulxuꞌmichcho Yoonaasi waaho gobbaanni fushshite tuffanno gede assi. Hakkunni gedensaanni Yoonaasi Nennewe haꞌri. Tini xagge Yihowa asse yaannonkere baala assa hasiissannonketa dileellishshanno?