Mitte Harrichcho Coyidhu

HARRICHCHO coyidhanna macciishshite egennootto? ‘Diegennoommo; saada coyidhe affannoni?’ yiittokki digatatto. Ikkollana Qullaawu Maxaafi mitte harrichcho coyidhinota kulannonke. Kuni hiitto ikke ikkinoro hanni laꞌno.

Isiraeelete manni Kanaꞌꞌaani gobba haꞌrate kai. Moaabi gobba nugusi Baalaaqi Isiraeele waajjino. Konni daafira Isiraeele rumanno gede Beliaami yinanni busulu manchira sokka soyi. Baalaaqi lowo woxe eemmohe yiinosi daafira, Beliaami harrichchosi gulufe Baalaaqiwa haꞌri.

Yihowa Beliaami mannasi rumara dihasiꞌrino. Konni daafira Yihowa Beliaami haꞌrannota hoolate, seeda bise adhino sokkaancho doogote uurranno gede soyi. Beliaami sokkaancho dilaino; harrichchosi kayinni laꞌino. Konni daafira harrichcho sokkaanchu widira higge haꞌra gibbu; hakkiinnino doogote ubbe gibbu. Beliaamino lowo geeshsha hanqe harrichchosi dullunni gani.

Hakkiinnino Yihowa, Beliaami harrichchosi coyidhanna macciishshanno gede assi. Harrichchono, ‘Ganattoehu ma asseennaheeti?’ yite xaꞌmitusi.

Beliaamino, ‘Balala mancho assoottae. Bise heedhoommeꞌꞌero sheemmohenka!’ yee qolise.

Harrichchono, ‘Bashsho togo asse egennoommaheni?’ yite xaꞌmitusi.

Beliaamino, ‘Diegennoottae’ yiise.

Hakkiinnino Yihowa, Beliaami doogote seeda bise adhe uurrino sokkaancho laꞌꞌanno gede assi. Sokkaanchuno, ‘Harrichchokki mayira ganitto? Isiraeele rumattokki gede haꞌratto doogo cufate dawoommo. Harrichchokki anewiinni wirri yaa hooggoommero, ise mittore assummokki ate bisetenni sheemmohenka’ yiisi.

Beliaamino, ‘Soꞌroommo. Ati doogote uurroottontawe diafoommo’ yii. Sokkaanchuno Beliaami haꞌranno gede fajjisi; isino Baalaaqiwa sae haꞌri. Beliaami xaano Isiraeele rumara hasiꞌrino; ikkollana Yihowa rumannota hoole sase hige maassiꞌrannonsa gede assi.