Uduunne Hayishshiꞌnanni Maashine Hunda Maanxoonni Woraqatta

Zariina cuuante Yihowa Farciꞌraasincho ikkituhu gedensaanni, lame seennese ammaꞌnose garinni lossiꞌrate Ruusiyunni gobbase Mereerima Iisiya higgino. Angate anje noose daafira, annisenna amase, hattono rodiisenna minaamasi ledo mitto mine heeꞌra hanaffu. Annisenna amase ise qaaqquullisera Qullaawu Maxaafi halaale rosiissannokki gede hajajise. Qoleno insa qaaqquullese ise ledo Qullaawu Maxaafire hasaabbinoonte yiino.

Zariina qaaqquullisera Yihoware ma garinni rosiissannoro seekkite heddu. (Lawishsha 1:8) Konni daafira, Yihowa biddishshanna hayyo aannose gede eeggifatte huuccidhu. Hakkiinni, huuccattose ledo sumuu yaannore assitino; ise qaaqquullise ledo gobbara fulte milli yitanno woyite dhagge ikkitannote Maganu kalaqo daafira kultannonsa. Togoohu haranchu hasaawi seennise Kalaqaanchu daafira lede afa hasiꞌranno gede assino.

Hakkiinni, Zariina Qullaawu Maxaafi Addinta Mayyee Rosiisanno?a yaanno maxaafinni qaaqquullisera ledde rosiissanno hayyo maꞌlitu. Ise maxaafu aaninni guffanna xaꞌmuwa noo gedeenni shiima woraqattara galchitu. Qoleno qaaqquullu borrote hedo roore huwata dandaanno gede kaaꞌlate, wole shiima hedono ledde borreessitino. Hakkiinni hattenne woraqatta irsaasete ledo, biso hayishshiꞌnanni kifilera noote uduunne hayishshiꞌnanni maashine hunda maaxxu. Seennise hatte kifile eanno woyite, borro nabbawe kae xaꞌmuwate dawaronsa borreesse woranno.

Zariina wolewa mine afidhe qaaqquullese adhite fultara albaanni, Qullaawu Maxaafi Roso yaanno maxaafita lame fooliishsho insa ledo konni garinni xiinxalla dandiitino. Fulte martinowa kayinni qarrisannohu nookkiha qaaqquullese lossiꞌra dandiitino. Birra 2016nni lamenti seennise cuuamino; insa amansa hayyotenninna wodanchatenni Maganu Qaale rosiissinonsa daafira hagiirraammaho.