Minunni Mine Hadhine Sabbakkinannihu Tennenni Gato Afiꞌneemmo Yitineeti?

Deeꞌni. Duucha woyite minunni mine haꞌne sabbankeemmo; kayinni sabbankeemmohu konni loosinkenni gato afiꞌneemmo yine diꞌꞌikkino. (Efesooni Sokka 2:8) Hatto yineemmohu mayiraati?

Hanni mitto lawishsha laꞌno: Mittu shooshaqu manchi mittu bayichira isi yiino barra daanno mannira mitto lowo geeshsha muxxe ikkino uduunnicho aara qaale eino yine hendo. Kuni manchi yiinore assanno yite ammanattoha ikkiro, yiino barra hakkiira dimaratto? Marattoti dihuluullammannite. Qoleno, jaallakkinna maatekkino hakkiira marte uyinannire adhitanno gede, insarano kulattoha ikkara dandaanno. Ikkollana, hakku manchi yiinore assattohu hakkonne uduunnicho umikki loosinni afiꞌreemmo yite diꞌꞌikkino. Manchu uduunnicho aannohehu aahera hasiꞌrino daafiraatilla.

Hatteente gede, Yihowa Farciꞌraasine Maganu isira hajajamanno mannira hegere heeshsho aara qaale einota ammantanno. (Roomu Sokka 6:23) Wolu mannino Maganu uyino hexxo ragiꞌra dandaanno gede, hexxonke wolootaho kulate sharrammeemmo. Ikkollana, soqqammeemmohu uminke loosinni gato afiꞌneemmo yine hende diꞌꞌikkino. (Roomu Sokka 1:17; 3:28) Noore coyiꞌniro, Maganu aannota tenne dhagge ikkitanno elto umisi loosinni afiꞌra dandaanno manchi dino. “Ninke keeraanchimmanni ikkikkinni, isi [Maganu] maarosinni gatisinonke.”—Tiito 3:5.