WEDELLOOTU XAꞌMITANNO XAꞌMO
Roso Giwisinoeha Ikkiro Maa Asso?
Furro-fuuqqo hoꞌlanno rosiisaancho. Darawo abbitanno qarra. Fonqolu yanna yaaddo; mini loosi batinye. Roso giwisinoheha ikkiro, mayira giwitto diyinannihe. Reechelia yinanni wedellitte togo yitino:
“Rosu minella ikka hoogiro wolewa ayewano ikkiro haꞌreemma. Rosu minira haꞌrammante, wayi laga woy jaallaꞌyawa haꞌrummaro woy isinni mine sagale qishanninna mine feyanni maateꞌya kaaꞌlummaro woyyannoe!”
Atino Reecheli gedeetiro, rosu mini usuru mini gede ikkahera dandaanno; hakko daafira, ‘Konni usuru mininni fuleemmohu maassameemmo woyite callaati’ yite hedattoha ikkara dandaanno. Ikkina rosu mine sayisatto yanna daafira, dancha danchare heda dandaattohu hiittoonniiti?
Ati tenne afootto? Rosu mini daafira gara ikkitino lao heedhuhero, rosu minira haꞌra hasiissinohe daafira calla ikkikkinni baxxe haꞌrattoha ikkatto. Qoleno rosu lophite jawa ikkatto woyitira hasiissannohe dandoo lossiꞌratto gede kaaꞌlannohe uduunnicho ikkannohe.
Rosu minira gara ikkitino lao heedhannohe gede, aante noo coyibba hedate woꞌnaali:
Qajeelsha. Roso rositto kiiro, albillitte loosu bayicho iillannohe qarranna heeshshokki giddo tuncu yaannoheha wole qarra tirate roore qajeeloottoha ikkatto; tini qolte kaittorira baalaho mannu kaaꞌlo agadhattokki gede kaaꞌlitannohe. Ateneeto togo yite xaꞌmi: ‘Rosu mine baxisannoekkihu mitu coyi nooha ikkirono, heeshshoꞌyara kaaꞌlannore maa maa rosanni noommo?’
Qullaawu Maxaafi biddishsha: “Beettoꞌya ballo, egennonna wodancha seekkite cuꞌmiꞌri.”—Lawishsha 3:21.
Ledde afate, “Rosu Mine Abbeemmo Gumi Ajiro Ma Asso?” yaanno birxicho lai.
Dancha rosicho. Rosu mine nootto woyite lossiꞌratto rosichi yanna danchu garinni horoonsiꞌratto gara afatto gede, umokki qeeꞌlattoha ikkatto gedenna loosoho diinaggaawattoha ikkatto gede kaaꞌlannohe; tini akatta lophite jawa ikkatto woyitira lowo geeshsha hasiissannohete. Ateneeto togo yite xaꞌmi: ‘Rosu mini umoꞌya qeeꞌleemmoha ikkeemmo gedenna worba loosaasincho ikkeemmo gede kaaꞌlanni nooehu hiittoonniiti? Tenne akatta roore woyyeessiꞌra dandeemmohu ma garinniiti?’
Qullaawu Maxaafi biddishsha: “Diinaggaambe loosiꞌra qiniite uyitanno.”—Lawishsha 14:23.
Ledde afate, “Yannaꞌya Danchu Garinni Horoonsiꞌra Dandeemmohu Hiittoonniiti?” yaanno birxicho lai.
Wolootu ledo noohe aante. Ledokki rossannori ledo noohe aante, manna mararattohanna ayirrisattoha ikkatto gede kaaꞌlitannohe. Jooshuwa yinanni beetti togo yiino: “Xaggenna sayinse rosa hasiissannota ikkitinonte gede, mannu ledo hasaambanni gara rosano hattonni hasiissannote.” Isi lede “Mannu ledo hasaawa rosa, heeshshonke diro woꞌma kaaꞌlitannonke dandooti” yiino. Ateneeto togo yite xaꞌmi: ‘Rosu mine, lophitino garinna ammaꞌnonsa anetewiinni baxxitinota ikkituro nafa wolootu ledo sumuu yee heeꞌrate kaaꞌlannoere maa rosoommo?’
Qullaawu Maxaafi biddishsha: “Mannu baalu ledo keere heeꞌrate . . . jawaatte!”—Ibiraawoota 12:14.
Ledde afate, “Hasaaweemmo Gara Woyyeessiꞌrate Maa Asso?” yaanno birxicho lai.
Albillittete heeshshokki. Rosu, dandookki badde afatto gedenna dandookki ledo sumuu yitanno mixo fushshiꞌratto gede kaaꞌlannohe. Biruuki yinanni beetto togo yitino: “Ani assummante gede, mitto rosu gola doodhitine rosa dandiitinanniha ikkara dandaanno; hatto assaꞌne roso guddine maassantinihu gedensaanni loosoho ikkadda ikkitinanni gede assitannoꞌne.” Ateneeto togo yite xaꞌmi: ‘Roso gude maassamummohu gedensaanni, heeshshote hasiisannoere afiꞌrate hiittoo looso looseemmo? Hattoo looso afiꞌrate kaaꞌlannoe gedee roso rosa dandeemmohu hiittoonniiti?’
Qullaawu Maxaafi biddishsha: “Assattore buuxxe afittoro, loosattori gara ikkannohe.”—Lawishsha 4:26.
a Mite suꞌmuwa soorrinoonni.