Ammaꞌnino Manna Sabbakkinannihu Mayiraati?

Ammaꞌninohu batinyu manni Qullaawu Maxaafi daafira hasaawa lowo geeshsha baxannota wodanchinoommo. Hige mittu manchi baxino ammaꞌno harunsate qoosso noosita anfoommo; qoleno sokkanke macciishshe adhara digiddeessineemmo.

Manna ammaꞌnote daafira hasaawinseemmo woyite, Qullaawu Maxaafi yaanno garinni ‘shaqqillunninna owaantetenni’ coyiꞌneemmo. (1 Pheexiroosi 3:15, 16) Mitu manni sokkanke adha giwara dandaannota anfoommo. (Maatewoosi 10:14) Ikkollana, mitto mancho marre hasaawinsummokkinni sokkanke adhannoronna teꞌee afa didandiineemmo. Qoleno mittu manchi lao soorrantara dandiitannota anfoommo.

Lawishshaho, mittu manchi loosu batiꞌreennasi macciishsha hoogiro, wole woyite kayinni ninke ledo hagiirrunni hasaawara dandaanno. Hakkiinni saeno, mannaho konni albaanni iille egenninonsakki qarri iillansara woy heeshshonsa soorrantara dandiitanno; hakka woyite Qullaawu Maxaafi sokka macciishshate maahoyye yitara dandiitanno. Konni daafira, manna mitte hinge hasaawinse calla diagurreemmo.