Dagate Silkenni Qullaawa Maxaafa Xiinxallisa

Biraazilete heedhannoti Dayeni Yihowa Farciꞌraasinchootinna woꞌma yanna Maganu Qaale sabbakkannote. Mitto barra silketenni Qullaawu Maxaafi sokka mannaho kultanni heedhe, mitto minaannanna minaama hasaawissino; insano lede afa hasiꞌrino. Hakkii insa wole xeertiꞌre noo qooxeessa doye haꞌrara kainotanna marannowa korreenteno Interneeteno nookkita kulise. Qoleno hadhanno qarqarira mittuno Yihowa Farciꞌraasinchi dino. Kuni minaanninna minaama Qullaawu Maxaafi hasaawansa sufate, maranno qachira noota dagate silke kiiro Dayenira uyi; hakkii mamoote mamoote hasaawannoronna ma yannara hasaawannoro hasaawe xaadisiꞌri.

Hasaawe wodhino saatera Dayeni bilbiltuta, minaanninna minaama silke kayisi! Hakkii lame lamala geeshsha, insa Dayeni ledo sase hige silketenni xaade Qullaawu Maxaafi hasaawa hasaawino.

Hakkuyi gedensaanni kay, kuni minaanninna minaama silke dikayisino. Dayeni kayinni hexxo mudhantenni, lamalate giddo sase higge hattee dagate silke bilbiltanni kayisanno manni ledo Qullaawu Maxaafi hasaawa hasaabbanno. Konni garinni, Dayeni hakko qachira heeꞌrannoha haammata manna Qullaawa Maxaafa xiinxallisa hanaffu.

Mitto barra, Dayeninna minaannise silketenni mitto aja beetto Qullaawa Maxaafa xiinxallisanni heeꞌreenna, mittu beetekiristaanete murrichira konne hasaawa macca gantannosi. Isi hasaawa seekke macciishsha hasiꞌrino daafira, daye Qullaawu Maxaafi rosaanchira mule ofolli. Hakkii kuni murrichi Dayeninna minaannase hasaawiseemmo yii. Isi macciishshinore lowo geeshsha baxino daafira, isono xiinxallinsannisi gede xaꞌmiꞌri!

Dayeninna minaannise, hakkuyi xeertiꞌre noo qachira silketenni Qullaawa Maxaafa xiinxallisanno manni kiiro lexxite lee ikkitino; hakkuri giddo mittu aleenni kulliho beetekiristaanete murrichaati. Xiinxallanno manni giddo mitu isinni hattee dagate silkenni songote gambooshshe macciishsha hanafino. Mittu isinni Qullaawa Maxaafa xiinxallara daanno manni ofollara yee xarapheessa seekkino.

Dayeninna minaannise Maganu Gashshooti sokka konni xeertote noo qachira duduwate faro afiꞌrino daafira lowo geeshsha hagiidhino. Dayeni togo yitino: “Mittu manchi aye geeshsha xeertote heeꞌrannoha ikkiro nafa, Yihowa hakku manchi dancha duduwo macciishshanno gede assa dandaanno.”