Bikku Heeshsho Heeꞌrate Kaꞌnummo

Madiyaninna Maarsela Kolombiyaho, Medeliini katamira qawaaxxote heeshsho heeꞌrannoreeti. Madiyani adhanno damoozi lowoha ikkino daafira, insa injiino minira heeꞌranno. Ikkollana, Yihowa Farciꞌraasine ikkinori kuri minaanninna minaama heeshshonsa giddo maa balaxisiisa hasiissannonsaro hedanno gede assannonsari tuncu yiinsa. Insa togo yiino: “2006nni, ‘Illeꞌne Xunsite Laꞌo’ yaannoha baxxino gambooshshe beeqqinummo. Shiqqinoti batinye lallawo, Maganoho roore woꞌma giddonni soqqamate heeshshonke bikkunnita assiꞌra hasiissannonketa duudhe amaaltinonke.” Ledeno togo yiino: “Gambooshshe gunde minira haꞌnanni heeꞌne, ninke heeshsho tennenni lowo geeshsha baxxitinota huwantummo. Laꞌnummore baala hidhate rosichi noonke; qoleno lowo asali giddora eꞌnoommo.”

Madiyaninna Maarsela konni gambooshshinni rosinori heeshshonsa biddi assiꞌra hasiissannonsata huwachishinonsa daafira, bikku heeshsho heeꞌrate sharrama hanafi. Insa togo yiino: “Woxe kaꞌnummo gede fushsha agurrummo. Shiimu minira heeꞌrate hingummo, hattono makeenanke hirre motore hidhinummo.” Qoleno, laire baala hidha yorannokki gede uduunne hirranni bayicho haꞌra aguri. Roore yannansa olliinsa mannira Qullaawu Maxaafire kulanni sayisa hanafi. Hakkiinni saeno lamunku, baxxitino suwisaano ikkite Yihowara diinaggaabbe soqqantanno jaallansawa albinni roore aanannore ikki.a

Mulenni, Madiyaninna Maarsela Yihowara roore soqqama hasiꞌrino daafira kaaꞌlo hasiissannoti mitte songo noowa gaxare haꞌrate kai. Hakka haꞌrate, Madiyani looso agurino. Loosu sooreettera, isi konne kaajja looso mayira aguranni nooro horo leella giwise. Hakko daafira Madiyani mayira aguranni nooro xawisate togo yiise: “Ati afiꞌratta woxi lowoho; kayi hagiirraame ikkootta?” Iseno, tira dandiitinokkihu lowo qarri noose daafira hagiirraame ikkitinokkita maaxxukki kultusi. Hakkiinni Madiyani togo yiise: “Hakko daafira qaru coyi afiꞌneemmo woxe diꞌꞌikkino. Addinta hagiidhineemmo gede assannonkere bande afa hasiissannonke. Anenna minaamaꞌya hagiirsiisannonkeri mannaho Maganu daafira rosiisate; hakko daafira konne looso roorsine loonse lende hagiirraamma ikka hasiꞌneemmo.”

Madiyaninna Maarsela ayyaanaamittete mixonsa wonshiꞌrino daafira, xa harshammi yee heeꞌranni no; qoleno addu hagiirre afiꞌrino. Insa saiha 13 diro, Kolombiyaho sabbakkannori roore hasiissannowa noo songuwara soqqamanni keeshshino. Xa lamunku baxxitino suwisaano ikke soqqamate qoosso afiꞌre hagiidhanni no.