KIRISTAANU HEESHSHO
Qullaawa Maxaafa Xiinxallate Daafira Kultanno Viidiyubba Horoonsiꞌnanni Gara
Soqqanshote horoonsiꞌneemmoti, Qullaawa Maxaafa xiinxallate daafira kultannoti shoole viidiyo noonke. Tenne mitte mittenta viidiyo qixxeessinoonnihu maa hendeeti?
Qullaawa Maxaafa Xiinxalla Hasiissannohu Mayiraati?—Woꞌma Viidiyo: Tenne viidiyo qixxeessinoonnihu mittu manchi ammaꞌno ikkitutano ikkituro Qullaawa Maxaafa xiinxallate hasatto heedhannosi gede assateeti. Tini viidiyo mannu huluullitannonsa xaꞌmuwara dawaro Qullaawu Maxaafi giddonni hasiꞌranno gede jawaachishshanno; hattono Qullaawu Maxaafi giddo ammansiissanno taje noota kultanno. Qoleno Qullaawa Maxaafa xiinxalla hasiꞌranno manni xiinxallo hanafate xaꞌmiꞌra dandaanno gara kultanno.
Qullaawa Maxaafa Xiinxalla Hasiissannohu Mayiraati? (harancho) yitanno viidiyo, woꞌma viidiyo ledo mittu garite; kayinni mitto daqiiqa saꞌe yitannori dino. Roorenkanni tenne viidiyo qixxeessinoonnihu hasaawate gari yanna afiꞌrinokki manniraati.
Qullaawa Maxaafa Xiinxallinseemmohu Hiittoonniiti? yitanno viidiyo qixxeessinoonnihu mannaho Qullaawa Maxaafa mulla xiinxallinseemmota kulateeti; hattono tini viidiyo xiinxallinseemmo gara lainohunni mannu xaꞌmara dandaannote mite xaꞌmora dawaro qoltanno; qoleno xiinxalla hasiꞌranno manni xiinxallinsansara xaꞌmiꞌra dandaanno gara kultanno.
Qullaawu Maxaafi Xiinxallora Hawalle Keere Dayootto yitanno viidiyo qixxeessinoonnihu Qullaawa Maxaafa xiinxallanno mannira leellishateeti. Tini viidiyo Hegerera Hagiidhitanni Heeꞌra Dandaatto! yaanno maxaafa qoola lame egensiissannoha ikkirono, Hegerera Hagiidhitanni Heeꞌra Dandaatto! yitanno biroshere xiinxallinsanni woyiteno leellisha dandiinanni. Qoleno tini viidiyo maxaafu amadonna rosaanchu xiinxallannohu hiittoonniitiro xawissanno.
Mitte mittenta viidiyo qixxeessinoonni korkaati heeꞌrirono, hasiissanno yannara kuri viidiyubba mannaho leellisha woy soya dandiineemmo. Kuri viidiyubba seekkitine egentinanni gedenna soqqanshote yannara danchu garinni horoonsidhinanni gede jawaachinsheemmoꞌne.