Tini Alame Baꞌanno Woyite Gante Saꞌneemmota Huluullantinoonte

Yihowa cincasi gooffeenna tenne busha alame muli yanna giddo hunanno. Kaphu ammaꞌno baꞌanno, buusantino daga Maganu manna siꞌanno hattono Yihowa Armagedooni yannara bushuulle gudanno. Kiristaanu tenne dhagge ikkitanno yanna quqquxame agadhanno.

Hige bayiru qarri yannara ikkannoha mitto mittonka coye dianfoommo. Lawishshaho kuni qarri hanafannohu mamooteetiro dianfoommo. Poletiku gashshaano kaphu ammaꞌno hunate kaꞌanno gede assannonsari maatiro dianfoommo. Daga Maganu manna siꞌanni mageeshshi yanna keeshshitannoro woy ma garinni siꞌannoro dianfoommo. Qoleno Yihowa Armagedooni yannara bushuulle hunate maa maa horoonsiꞌrannoro dianfoommo.

Ikkirono Qullaawa Borro tenne albillitte dagganno yanna waajjineemmokki gedenna worbuulle ikkineemmo gede kaaꞌlitanno mashalaqqe kultannonke. Lawishshaho heeꞌnoommohu “goofimarchu barra” ikkinota anfoommo. (2Xi 3:1) Halaalaancho ammaꞌno baꞌannokki gede kaphu ammaꞌno siꞌnanni barruwa ‘haraꞌmitannota’ anfoommo. (Mt 24:22) Yihowa mannasi gatisannota anfoommo. (2Ph 2:9) Qoleno Yihowa bushuulle hunanno gedenna lowo manni Armagedooni gate saꞌꞌanno gede assate doorinohu Yesuusi keeraanchonna wolqaataamo ikkinota anfoommo.—Aj 19:11, 15, 16.

Albillitte dagganno yanna mannu “waajje daaqanno” gede assitannoti egennantinote. Ikkirono, Yihowa konni albaanni mannasi gatisino garanna isi albillitte ikkannori daafira kulinore nabbawanna hiincanke gatonke barri iillinota addaxxine ‘iima hinge laꞌneemmo’ gede assitannonke.—Lu 21:26, 28.