Hegerera Hagiidhitanni Heeꞌra Dandaatto! Yitanno Borrora Nooha Kaaꞌlanno Coye

Hegerera Hagiidhitanni Heeꞌra Dandaatto! yaanno maxaafira noo viidiyubbanna rosaanchu giddosita coyiꞌranno gede assitanno xaꞌmuwa horoonsiꞌra baxatto? “Mitu Manni Togo Yaanno,” “Mixo” hattono “Egenno Lexxi” yaanno gafana? Manna rosaano assate looso loosatto woyite horoonsiꞌra dandaattohu wolu gafi hiikkonneeti?—Mt 28:19, 20.

Miidiya: Qullaawa Maxaafa xiinxallisattohu attammoonni maxaafa horoonsidhe ikkiro, addi addi viidiyonna wole miidiya qarramittokki mitto bayicho afiꞌra dandaattohu hiittoonniiti? Elekitiroonikisetenni qixxeessinoonni maxaafira, shoolu gafi giddonni mitto doori. Rosu birxichuwara woroonni hakko gafi giddo qummi assinoonni miidiya baala afiꞌra dandaatto. (Misile 1 lai.)

“Printed Edition” yaannoha: Xiinxallisattohu elekitiroonikisetenni qixxeessinoonni borro horoonsidhe ikkiro, xiinxallisatto woyite “Printed Edition” yaannoha horoonsiꞌrakki kaaꞌlitahera dandiitanno. Mitto roso faꞌnittohu gedensaanni umoonni noota sase naxiwe kisse “Printed Edition” yaannoha doori. Tini, hasaabbinanni heedhinoonniri rosu cuꞌmo ledo mayi xaadooshshe afiꞌrinoro huwatate kaaꞌlitaꞌnera dandiitanno. Elekitiroonikisetenni qixxeessinoonni borrowa higate wirro sase naxiwe kisse “Digital Edition” yaannoha doori.

“Qixxaawoommo?”: Maxaafu jeefo adda nooti tini saaxinna, rosaanchu songote ledo soqqamatenna cuuamate ikkado ikkate assa hasiissannosiha qara qara coye luphi assite xawissanno. (Misile 2 lai.)

Guwuursha: Guwuurshu mite hasiissanno hajo xawissanno hedo amadino. Elekitiroonikisetenni qixxeessinoonni maxaafi aana, mittu mittunku guwuurshi jeefora hasaabbinanni heedhinoonni rosiwa massitanno linke no. (Misile 2 lai.)