KIRISTAANU HEESHSHO
Qoqqowu Gambooshshinke Baxille Leellishate Faro Fanannonke
Qoqqowu gambooshshinke yannara baasa hagiidhineemmohu mayiraati? Hundi Israeele warinte gede, qoqqowu gambooshshinke yannara xibbunni, wole agurina kumunni kiirranniri ammanate roduuwinke ledo Yihowa magansiꞌneemmo faro afiꞌneemmo. Falakkinota ayyaanaamittete sagale mitteenni sagaꞌlineemmo. Qoleno hakko jaallankenna maatenke ledo mitteenni dancha yanna sayinseemmo. Tenne qixxaawo lowo geeshsha naandeemmo daafira, sasenka barra dihonseemmo.
Mitteenni gamba yineemmo woyite, uminke qiniite calla ikkikkinni wolootaho baxille leellisha dandiineemmo dooggano heda hasiissannonke. (Ga 6:10; Ib 10:24, 25) Gambooshshu basera mittu rodiira woy rodoora waalcho fanneemmoha ikkiro woy ninkera ikkanno barcima calla amandeemmoha ikkiro, wolootaho woyyannore hendanni heeꞌnoommo. (Fil 2:3, 4) Qoqqowu gambooshshi haaro jaalla kalaqiꞌneemmo faro fanannonke. Pirogiraame hanaffara albaanninna gooffu gedensaanni, hattono barri sagale saatera, egenninoommokki roduuwi ledo egennamate woꞌnaala dandiineemmo. (2Qo 6:13) Togoo yannara kalaqiꞌnoommo jaaloomi, geedonniha ikkara dandaanno! Duuchunkunni roore, addu baxille leellinsheemmo gara laꞌꞌanno manni ninke ledo Yihowa magansiꞌra doodhara dandaanno.—Yoh 13:35.
“BAXILLU GEEDONNIHO” YAANNOHA DAGA DAGIYYOTE GAMBOOSHSHE YITANNO VIIDIYO LAꞌINIHU GEDENSAANNI, AANTE NOO XAꞌMUWARA DAWARO QOLATE WOꞌNAALLE:
2019hu daga dagiyyote gambooshshira dayino wosinira roduuwu baxille leellishshinohu hiittoonniiti?
Yihowa manni mereero noo mittimmanna baxilli lowo geeshsha dhagge ikkannohu mayiraati?
Aliidi Bisi miilla baxille leellinshannita hiittenne doogga luphi assite kultino?
Qoqqowu gambooshshinkewa baxillu roore halaꞌlanno gede kaaꞌla dandaattohu hiittoonniiti?
Kiristaanu baxilli Jarmanetenna Wodiidi Kooriyira noo roduuwanke mitto assinohu hiittoonniiti?
Maa assate murciꞌra hasiissannonke?