KIRISTAANU HEESHSHORA
Dancha Duduwo Hagiirrunni Dudubbe
Sabbaka qarra ikkite egentinohe? Ninke giddo duuchaho sabbaka qarra ikkitinonke woti no. Mayira? Qoqqowinkera noo manni kulleemmonsa sokka lashshi assannohura, giwannonkehura, woy anfoommokki mannira farciꞌra waajjishannonkehura ikkara dandaanno. Kuri coyibba hagiirrenke huntara dandiitannoti dihuluullissannote. Ikkollana magansiꞌneemmo Magani hagiirraamo ikkino daafira, isi hagiirrunni soqqammammosira hasiꞌranno. (Fa 100:2; 1Xi 1:11) Sabbakate loosinni hagiidhineemmo gede assannonkehu sasu korkaati maati?
Umihunni, dudumbeemmo sokka hexxonnire kultannote. Yannankera alamete aana noo manni hexxannori noonsakkiha ikkirono, ninke kayinni wodaninsara ‘danchu duduwi’ woꞌmanno gede assa dandiineemmo. (Is 52:7) Maganu Mangistehu danchu duduwino lowo geeshsha hagiirsiisannonke. Sabbakate fultinara albaanni Maganu Mangiste albillitte uullate abbitanno atoote hiince.
Layinkihunni, dudumbeemmohu danchu duduwi manna maalaamittetenna ayyaanaamittetenni kaaꞌlannonsaho. Insa gawajjanno coye assa agurranni gara rossanno, hattono hegere heeshsho afiꞌrate hexxo heedhannonsa. (Is 48:17, 18; Ro 1:16) Ninkeneeto manna hase reyotenni gatisanno manchi gede assine laꞌꞌa dandiineemmo. Mitu manni gato hasiꞌrannokkiha ikkirono, gato hasiꞌranno manna hasa diagurreemmo.—Mt 10:11-14.
Sayikkihu qaru korkaati, sabbakate loosinke Yihowa ayirranno gede assanno. Isi loonseemmoha sabbakate looso lowori gede asse laꞌꞌanno. (Is 43:10; Ib 6:10) Qoleno, isi konne looso loosa dandiineemmo gede shaqqillunni qullaawa ayyaanasi aannonke. Konni daafira, Yihowa qullaawu ayyaani guma ikkinoha hagiirre aannohe gede eegante huucciꞌri. (Ga 5:22) Isi kaaꞌlonni yaaddonke qeelle, waajjinummokkinni sabbaka dandiineemmo. (Soq 4:31) Hakkiinni qoqqowinkera mannu macciishshirono macciishsha giwirono, sabbakate loosinkenni hagiirre afiꞌra dandiineemmo.—Hi 3:3.
Soqqamatto wote heeꞌrahera hasiꞌratto akati hiikkonneeti? Hagiirrekki leellisha dandaattohu hiittoonniiti?
XIINXALLOTENNINNA HIINCATENNI GALAGALLE HAGIIRRAAMMA IKKA YITANNO VIIDIYO LAꞌINI GEDENSAANNI AANTE NOO XAꞌMUWARA DAWARO QOLLE:
Aganu kiiro qanchu soqqanshora lowo saate soqqammeemmoha ikkirono, ayyaanaamittete coye xiinxallate yanna gaaꞌma hasiissannonkehu mayiraati?
Meeri lawishsha harunsa dandiineemmohu hiitte doogonniiti?
Maganu Qaale hiincattohu mamoote mamooteeti?
Dancha duduwo duduwatto wote hagiidhatto gede assannoheri maati?