Yesuusi Daafira Kulanno Halaale Diinaggaawe Sabbaka

Yesuusi daafira kulanno halaale mannaho kulleemmo gara anfummoro albinni roore diinaggaambeemmo. Safonnihu qasiꞌrote kinchi Yesuusaati; addu ammana xintantinohu isi aanaati. (Efe. 2:20) Isiweelo hegere heeshsho hexxo diheedhannonke. (Looso 4:12) Konni daafira baalunku, Yesuusi Maganu alaami giddo loosanno looso afa hasiissannonke. Lowo manni Qullaawu Maxaafi rosi ledo sumuu yaannokki rosinni dogamino. Konni mannira Maganu Yesuusa ammantannota loosunni leellishshannorira qixxeessino atooti gate baꞌꞌansaraati. Hakko daafira, halaaleho diinaggaawanke suwino wodani noonsari Yesuusi daafira gara ikkitino egenno afidhanno gede yaano, Maganu ledo noosi fiixoomanna Maganu alaami giddo noosi qeecha affanno gede kaaꞌlineemmonsa gede kakkayisannonke. Ikkina, Qaagooshshu Ayyaani woggara Yesuusi daafira kulanno halaale diinaggaabbine sabbakkinanni?