Mangistete Sokka Duduwate Afidhinanni Faro Baala Horoonsidhe!

1. Daawiti lawishshinni maa ronseemmo?

¹ Nugusu Daawiti iillinosi coyi hexxo mudhanno gede assasira diwodhino. Lawishshaho, Daawiti Yihowara mine mina hasiꞌrino. Isi mine minannota hoollisita, mixosi biddi assire, beetemeqidese Salamooni minanno wotira hasiisannore qixxeessino. (1 Neg. 8:17-19; 1 Zee. 29:3-9) Daawiti assa dandaannokkire agure assa dandaanno coyi aana illachishino. Maganu Mangiste sokka duduwate faro hasiꞌneemmo wote Daawiti lawishsha harunsa dandiineemmohu hiittoonniiti?

2. Heeshshonke gara afate maa assa dandiineemmo?

² Assa Dandiitinannire Asse: Lowo halashshaano kaaꞌlaano woy woꞌma yanna suwisaano ikkate heeshshonsa shota assidhino. (Mat. 6:22) Kiꞌneno tenne assa dandiitinakka? Heeshshoꞌne gara huuccattotenni assaabbinanniha ikkiro, “lowohu loosu xullichi” faꞌname nooꞌneta huwattinara dandiitinanni. Hatto ikkiro, hattee faro horoonsidhe!—1 Qor. 16:8 9.

3. Heeshshonke gari suwisaano ikka hoolinkero nafa farciꞌra dandiineemmoti hiikkuri faro noonke?

³ Heeshshoꞌne gari suwisaancho ikka hooliꞌneha ikkirona? Farciꞌrate afidhinannita wole faro ajishshine laꞌinoonte. Lawishshaho, loosunniwa ammantinokkiri ledo xaaddinanniha ikkiro, hattee faro insara farciꞌrate horoonsidhe. Woy xiwantine xagisidhinanni heedhinoonniha ikkiro, hattee faro horoonsidhine xagissannoꞌnerira farciꞌra dandiitinakka? Geedhimmatenni woy dhibbunni dhuku hooginonsari rippoorte qoltanno wote 15 daqiiqa qola dandiitanno gede qixxaawo assinoonnita habbinoonte. Soqqanshote rippoorteꞌne qoltinanni wote, sabbakate fultinoonnikki wote farcidhinoonni yanna leda deꞌinoonte; qoleno eltinoonni borro baalanta lawishshaho tiraaktuwa, Qaagooshshu Ayyaanihanna qoqqowu gambooshshiha koyishshu woraqata borreesse. Shiima labbannoti farciꞌnoommo yanna corante mageeshshita ikkitannoro laꞌinanni wote dhagge ikkaꞌnera dandaanno!

4. Maa assate murcidhine kaꞌinoonni?

⁴ Heeshshonke gari baxihano ikkiro, Maganu Mangisteha dancha duduwo duduwate afiꞌnummo faro baalanta horoonsiꞌno. Togo assinummoro, Maganu Mangistera yine dandiinummore baala assinoommota afanke lowo geeshsha hagiirsiissannonke.—Marq. 14:8; Luq. 21:2-4.