Aliidi Bisi Soyino Dabdaabbe

Muxxe Mootichu Soqqamaasine:

Konni baxxino dirira hanafote kiꞌnera dabdaabbe borreessanke lowo geeshsha hagiirsiissannonke! Konni 2014 diri gumulora banxeemmo Nugusinke Yesuusi Kiristoosi diinnasi mereero gashsha jammarinku xibbee diro woꞌmanno.—Far. 110:1, 2.

Konni soqqanshote diri hanafora, Wochi Tawori Bayibili Endi Tirakti Sosayitii Ovi Pensiliveeniyu diru gambooshshe assiꞌri wote, Haaro Alame Qullaawu Maxaafi Tiro Komite, xaa geeshsha qixxaabbinote Qullaawu Maxaafi tiro baalantenni roortanno tiro Ingilizete afiinni woyyeessine qixxeessinoonnita egensiissino. Yihowa umita Haaro Alame Tiro qixxaabbanno gede assinohu ayyaanunni buurantino oososi horoonsiꞌreeti. (Rom. 8:15, 16) Tini calla nafa tini tiro baxxitinote yineemmo gede assitannonke; dihattooti?

Aliidi Bisiti Borrote Komite, lowo diro Qullaawa Maxaafa tirate looso wolu coyinni balaxisiisse loossanni keeshshitino. Xaa yannara Haaro Alame Tiro woꞌma woy gama 121 afiinni qixxaabbino. Qullaawa Maxaafa afidhinoonnihura, Yihowa lowo geeshsha galattinannita leellishshinara amaalleemmoꞌne. Barru barrunku nabbabbe, hattono hiince. Hatto assitiniro, Qullaawa Maxaafa qixxeessinohuwa Maganu Yihowawa albinni roore shiqqinanni.—Yaq. 4:8.

Muxxe meyanna labbaa roduuwinkera addi addi fatani iillanni noonsata macciishshineemmo wote lowo geeshsha dadillineemmo. Mito wote roduuwinke wolu roduuwinsa ledo hagiidha hooggara dandiitanno. Lawishshaho, muli yannara Iisiyaho mitte maate giddo minu amara bisu gudisiꞌre hedeweelcho laanshaawita maatensa heeshsho umo lekkicho soorrantu. Akimootu coyi gurchaawinonsa daafira hursitasera didandiitino. Tini lowo geeshsha mararsitannote! Xa minaannise hashshano barrano isewiinni fafikki towaatannose. Labbaa beettisenna lame seennise qole isenna annansa baxillunni kaaꞌle wolootaho dancha lawishsha ikkanni no. Tini dancha maatenna addi addi fatana qeeltine saꞌinoonniri baalunku, ammanate fatana dandiine saꞌne afiꞌnanni hagiirre afiꞌra dandiitinanni. (Yaq. 1:2-4) Yihowa buuramaasineno wolu geꞌreewino fatanu yannara kaajjine uurrankenni hagiirre afiꞌneemmota coyiꞌrino; korkaatuno gumulote hegere heeshsho afiꞌne maassammeemmo!—Yaq. 1:12.

Sai diro, Qaagooshshu Ayyaana ayirrisate gamba yiino manni 19,241,252 ikkanno. Maganu gosa diru giddo gamba yitannohu lowonta hasiisanno gambooshshira kageeshshi manni gamba yee Yihowaranna Yesuusi Kiristoosira ayirrinye aanna laꞌꞌa lowo geeshsha hagiirsiissanno! Qaagooshshu Ayyaani woggara lowo miliyoone ikkitanno roduuwi Badheessunna Dotteessu aganira kaaꞌlaano suwisaano ikkitino daafira Yihowara shiqanno guweenyi baasa lexxino. Tini lowonta jawaachishshannote! Qoleno woradu aliidi laꞌꞌaanchi towaanyo yannara kaaꞌlaano suwisaano ikkitannori, towaanyo Badheessunna Dotteessu aganira ikka hooggurono, suwisaanote ledo heeꞌranno gambooshshe gudisse beeqqa dandiitannota kullita dihagiidhitinoonni? Ayyaanaamittetenni hayyoota ikkitinori, sabbakatenna songote looso diinaggaambe loosa lowo horo afidhinota huwattanno. Ayyaanaamu loosi batiꞌrinonkere ikkanke, Daawuloosi ammanankera wolqa ganatenna ninke halaalu doogonni fushshate sharramanno sharro qeelle, milli yinummokki kaajjine uurrineemmo gede kaaꞌlitannonke.—1 Qor. 15:58.

Saihu soqqanshote diro, 277,344 ikkanno manni heeshshonsa Maganoho sayise uyinota cuuame leellishe, alamete doyicho roduuwinsa ledo heeshshote widira massitanno doogo aana haꞌranni noota afa lowo geeshsha wolqa ikkitannote! (Mat. 7:13, 14) Kuri haaruuddu roduuwi “ammanatenni kaajje uurranno” gede ninke kaaꞌlo hasiissannonsa. (Qol. 2:7) Jeefote geeshsha kaajjitine uurra dandiitinanni gede mimmito jawaachishaꞌne agurtinoonte. (Mat. 24:13) “Cannaqantinore sheshifachishshe, laafoota irkisse, hattono mannu baalunkura cincaaleeyye ikke.” (1 Tes. 5:14) Roduuwa, mittu mittunku “Mangistekki daggo” yine ‘huucciꞌranke agurroonke.’—1 Tes. 5:17; Mat. 6:10.

Yihowa baxxinannire kiꞌne mitto mittonka banxeemmoꞌneta habbinoonte!

Roduuwiꞌne,

Yihowa Farciꞌraasinehu Aliidi Bisi

[DO NOT SET] References