Qullaawu Maxaafi Xiinxallo Jammarsiisate Kaaꞌlitannota Haaro Viidiyo
Qullaawa Maxaafa Xiinxalla Hasiissannohu Mayiraati? yitannota harancho viidiyonke jw.org aana lowo manni laꞌꞌanni no. Tenne viidiyo qixxeessinoonnihu, hasatto noonsa manni ninke ledo Qullaawa Maxaafa mulla xiinxallanno gede kakkayisateeti. Webisayitete kaimu qoolira hundaho “Qullaawa Maxaafa Xiinxalla Hasiꞌratto?” yaannoha qanse, woy haaro tiraaktuwankera badhiidi qoolira noota QR (quick response) yinanni koodde iskaane assine woy nabbawisiinse tenne viidiyo faꞌna dandiinanni. Tenne viidiyo dancha gede horoonsiꞌra dandiineemmo doogga aanchine xawinsoonni.
Manna galagaltine martine hasaawissinanni wote, togo yiiyye: “Qullaawu Maxaafi xaꞌmokkira dawaro afiꞌratto gara leellishshannota mitte harancho viidiyo leellishohe?” Ishshi yiiro, viidiyo mobayileꞌnenni woy isi kompiyuterenni fantine leellishshesi.
Sabbakate fultinoonnikki wote woy gudumaaleho soqqantinanni wote haaro tiraaktuwanke eltiniro, hakko noota QR koodde leellishshine mobayilesinni iskaane assanno gede kullesi. Duucha wote QR koodde iskaane assiniro hakkawontenni hatte viidiyowa woy Webisayitenkewa massitanno daafira, viidiyo mobayileꞌnenni anga iima fana dandiitinanni.
Ledoꞌne loossannorira, ledoꞌne rossannorira, fiixiꞌnera woy wolu egentinoonni mannira tenne viidiyore kulle, hattono hasidhuro leellishshensa. Woy viidiyonniwa massitanno linke imeeletenni sokkine, uminsa faꞌnite laꞌanno gede koyissensa.
Tenne haaro qixxaawo horoonsiꞌne, Qullaawa Maxaafa xiinxallannoha roore manna afiꞌnammora dandiineemmo; hakko garinni, “hegere heeshsho afiꞌrate dancha dooꞌꞌo noonsa” manna ayyaanaamittetenni kaaꞌlineemmo.—Looso 13:48.