Sabbankeemmo Gede Assannonkeri Maati?
1. Diinaggaambe soqqammeemmohu aye banxeemmo daafiraati?
1 Maganu Mangisteha dancha duduwo duduwa, xaa yannara loosu baalunkunni roore hasiisanno loosooti. Konne looso loosanke, Yihowanna olliichonke banxeemmo gede uyinoonninketa lame jajjabba hajajo wonshate kaaꞌlitannonke. (Marq. 12:29-31) Baxillu diinaggaambe sabbankeemmo gede assitanno wolqa afiꞌrino.—1 Yoh. 5:3.
2. Sabbakate loosinke Yihowa banxeemmota leellishannohu ma garinniiti?
2 Yihowara Noonke Baxille: Lubbote Jaalinkera Yihowara noonke baxilli, isira kaaꞌline coyiꞌneemmo gede assannonke. Sheexaanu 6,000 meddi yaanno diro Yihowa suꞌma hunanni keeshshino. (2 Qor. 4:3, 4) Konni garinni mannu, Maganu cubbaataamma giiratenni qaxxaasanno, Maganu bande afa dandiinannikkiho Sillaaseeti, hattono mannu ooso qarri isira dixiwannosi yee ammananno gede assino. Lowo manni isinni, Maganu dino yaate geeshsha iillino. Konnira mannu iimi Annanke seekke afanno gede assate lowo geeshsha quqquxammeemmo! Wolqanke assitu geeshsha diinaggaambe Maganoho naqaashe ikkanke, wodanisi hagiidhanno gede, hattono Sheexaanu fooggalanno gede assitanno.—Law. 27:11; Ibi. 13:15, 16.
3. Soqqanshonke olliichinkera baxillu noonketa leellishshannohu hiittoonniiti?
3 Olliichinkera Noonke Baxille: Mittu manchira halaale farciꞌnummo kiiro, hakko mancho banxeemmota leellinshanni heeꞌnoommo. Buutote qarri woꞌminote tenne yannara mannaho danchu duduwi lowonta hasiisino. Lowo manni biꞌre Yoonaasi diro noote Nennewete gosa gede, ‘guranna qiniite bade diafino.’ (Yon. 4:11) Soqqanshonke mannu hagiirraamenna dancha heeshsho heeꞌranno gara afanno gede assitanno. (Isa. 48:17-19) Qolteno, hexxo heedhannonsa gede assitanno. (Rom. 15:4) Mannu kulleemmonsare macciishshe hajajamannoha ikkiro, “gatanno.”—Rom. 10:13, 14.
4. Yihowa horonta hawannokkihu maati?
4 Dancha ooso annansanna amansa baxxannohu saꞌe saꞌe calla diꞌꞌikkino. Insa ayewoteno baxxanno. Hatteente gede, Maganonna ollaanke, yaano manna baala lubbora banxeemmoha ikkiro, sabbakate hende fulloommo yannara calla ikkikkinni ayewoteno farciꞌrate injiitanno faro hasiꞌneemmo. Farciꞌra agurreemmo yanna dino. (Looso 5:42) Yihowa togoo baxille horonta dihawanno.—Ibi. 6:10.