Aliidi Bisi Soyino Dabdaabbe
Muxxe Meyanna Labbaa Roduuwa:
Baxilleho iimi Anninke Yihowa ledo taalamannohu mittuno dino. Qullaawu Maxaafi, “Maganu baxilleho” yaannohu iseraati. (1 Yoh. 4:8) Yihowa Duuchanka Dandaannoha ikkirono, Qaalisi mitto bayicho nafa, “Maganu wolqate” diyaanno. Gashshootisira roorenka xinta ikkinohu baxilleho. Tini isiwa hinge xiiphineemmo gede assitannonke!
Yihowa soqqammeemmosi gede digiddeessannonke; tini hagiirsiissannote. Isi wolqatenni gadadise gashshannoha diꞌꞌikkino. Yihowa iso banxe soqqammammosira hasiꞌranno. Konni garinni soqqamme, gashshootisi gara ikkinotanna baxillu nooha ikkinota ammanne galleemmota leellinsheemmo. Yihowa gashshooti gara ikkinotinna baxillu nooha ikkinoti mannu ooso kalaqantu warinni jammarte leeltanni daggino.
Yihowa Addaaminna Heewani hajajantannosi gede giddeessa agure, uminsa baxisinonsare doodhitara faro uyinonsa. Insa Yihowa addinta baxxannoha ikkoommeronna assinonsarira galatu heeꞌroommensaro, Sheexaanu finqiltanno gede assansara sammi yite diwodhitanno.
Muse Isiraeelete gosara jeefote coyiꞌrino coyi giddo togo yiino: “Kuneeti, techo albakkiinni heeshshonna danchare, hattono reyonna bushare woroommo.” (Marro 30:15) Isiraeelete manni hiittoo heeshsho heeꞌrannoro uminsa wossaꞌna dandaanno. Iyyaasuno Isiraeele, “Yihowara soqqama busha labbe leeltannoꞌneha ikkiro, ayera soqqantinanniro techo umiꞌne doodhe” yiinonsa. Insa qolte Iyyaasura togo yitino: “Yihowa agurre wole magannara soqqama, horo hendeemmokki coyeeti.” (Iya. 24:15, 16) Ninkerano hattoo hedo noonke. Yihowa banxeemmo daafira, iso agura “horo hendeemmokki coyeeti.”
Addu Kiristaana ikkinoommo daafira, doodhate qoosso giddoseenni maa maa amaddinoro seekkine anfoommo. Cimeeyye amaaltanno gede, wole agurina seejjitanno gede silxaane uyinoonninsaha ikkirono, wolootu heeshsho diqorqortanno woy wolu ammana diꞌꞌillaallissanno. Hawaariya Phaawuloosi togo yee borreessino: “Ninke ammanaꞌnera mootooꞌmineemmore diꞌꞌikkinoommo; hatteentenni, kiꞌne hagiirre afidhinanni gede ledoꞌne loonseemmoreeti, korkaatuno kaajjitine uurritinoonnihu ammanaꞌnenniiti.”—2 Qor. 1:24.
Mitto coye giddeessininkekki ninke banxe assineemmo wote lowonta hagiidhineemmo! Yihowa dancha ikkinore baxillunni assinammora hasiꞌranno. Phaawuloosi ayyaanunni coyiꞌrino qaali, tini hasiissannota ikkitinohu mayiraatiro kulannonke: “Manna itisate nooere baala uummoronna naaxxeemmo gede bisoꞌya sayise uummoro, kayinni baxillu hoogiero, afiꞌreemmori mitturino dino.”—1 Qor. 13:3.
Yihowa, haammata miliyoone ikkitannori meyanna labbaa roduuwinke iso woꞌmu wodaninsanni baxxe soqqantannosita laꞌꞌanno wote giddosi lowo geeshsha hagiidhitanno!
Yihowano soqqamaanosi baalanta, alamenna alame uyitanno hagiirre gibbine iso baxxinannita leellishshinannire kiꞌne qaaqquulleno ikko wedelloota mitteenni, lubbora baxannoꞌne. Ninkeno lubbora banxeemmoꞌneta horo huluullantinoonte.—Luq. 12:42, 43.
Yihowa baxxinanni daafira sai diro, kiꞌne meyanna labbaa roduuwi, wedelluno mitteenni 1,748,697,447 saate dancha duduwo dudubbinoonni. Baxillu noonsa daafira, alamete deerrinni, 7,782,346 ikkitanno halashshaano qanchu soqqansho soqqantino. Qoleno 268,777 haaru manni insaneeto Yihowara sayise uyinota cuuame leellishino; tini lowo geeshsha hagiirsiissinonke, kuri giddo batinyu wedellaho. Wole yaattonni, saammintete kiiro mereerimunni 5,168 manni cuuamino yaate. Tini addinta lowo geeshsha tashshi assitannote!
Tenne goofimarchu yannara Maganu mannira lowo qarri iillannonsa; addi addi fatani, ammanansanni kainohunni iillannonsa qarri, xiwanu, mito roduuwa qole diru akkalle ledo daannori shetisannonsa. Ikkirono “duumballitte higa” hoogate woy “hexxo mudha” hoogate murciꞌne kaꞌnoommo. Kiꞌne baalanka lowo geeshsha banxeemmoꞌne.—Ibi. 10:39; 2 Qor. 4:16.
Roduuwiꞌne,
Yihowa Farciꞌraasinehu Aliidi Bisi