Tuntuꞌmoꞌne Hayyotenni Horoonsidhe
1. Umi Qorontoosi 9:26 soqqanshonke ledo mayi xaado afidhino?
1 Hawaariya Phaawuloosi, “Ani haꞌrannowa afikki dodanno manchi gede beebba didodeemmo; tuntuꞌmoꞌya kayiseemmohuno ayyare ganate diꞌꞌikkino” yee borreessino. (1 Qor. 9:26, NW) Isi togo yiinohu Yihowara mitte giddonni albinni roore soqqamate noosi mixo kulateeti. Ikkeennano, tenne xiqisera noohu xintu seeri soqqanshonkerano kaaꞌlanno. Soqqanshonkenni dancha guma afiꞌrate, ‘tuntuꞌmonke’ hayyotenni horoonsiꞌra yaano hayyotenni soqqamate sharrama hasiissannonke. Hiittoonni?
2. Sabbankeemmo yannanna base lainohunni Phaawuloosinna umi sani Kiristaani lawishsha harunsa dandiineemmohu hiittoonniiti?
2 Mannu Noowa Hadhe: Phaawuloosinna umi sani Kiristaani mannu heeꞌranno yite heddinowa hadhe sabbakkino. (Soq. Los 5:42; 16:13; 17:17) Killilenke giddo batinyu manni hawarro qaete heeꞌrannoha ikkiro, tini yanna minunni mine haꞌre soqqamate roore woyyitinota ikkitara dandiitanno. Qooxeessiꞌnera dikkote barra mannu dooggate haammate heeꞌranno? Suuqqate qooxeessira mannu haammatannohu hiittoo woteeti? Togoo wote doogote aani soqqanshonni dancha guma afiꞌra dandiinanni. Doogote aana soqqammeemmo wote manna lame lame ikkine hasaawisa roore woyyitanno. Sase sase ikkine fula dancha guma diuyitanno. Qoleno uminke hajore hasaambanni yanna huna agurre aantete coyishiinsheemmo mancho mayineemmoro assaawa danchate.
3. Killilete giddo soqqammeemmo wote tuntuꞌmonke hayyotenni horoonsiꞌra dandiineemmohu hiittoonniiti?
3 Killilete Giddo Hayyotenni Soqqamme: Killilete giddo soqqammeemmo woteno tuntuꞌmonke hayyotenni horoonsiꞌra hasiissannonke. Lawishshaho, batinye roduuwa amaddino gaamo mitto qooxeessa haaꞌne haꞌne insa biddi assate lowo wolqanna yanna hunantenni, gaamo beeha woyyitanno. Hattonni, xeertowa noo killile giddo soqqamate gamba yine haꞌneemmo wote mitteenni haꞌranno roduuwi boode ikkiro, lowo manni ledo hasaawanna killile rahe guda dandiineemmo. Doogo gooffanno saate gatisate qaenke qooxeessira killile adha dandiinammokka?
4. ‘Manna woshshaandeemmo’ wote dancha guma afiꞌneemmo gede mayi kaaꞌlannonke?
4 Yesuusi wongeela sabbakkannore ‘manna woshshaaddannorinni’ lawisino. (Maar. 1:17) Mittu qulxuꞌme woshshaadanno manchi alaami woshshaado wora calla ikkikkinni qulxuꞌme amadate. Konni daafira hayyichu woshshaadaanchi, qulxuꞌme heedhanno yannara heedhanno base haꞌranno, hakkiinnino bayichonko woshshaaxxanno. Ee, togoo woshshaadaanchi hayyotenni woshshaaxxate sharramanno. Ninkeno hattonni diinaggaambe jawaantetenni soqqammo.—Ibi. 6:11.