Ati Tenne Afootto?

Hunda mannu hodhishshu markaawe afiꞌrannohu ma garinniiti?

Xaphoomunni, Phaawuloosi waro manna calla hogobbe hadhanno markaawe dino. Duucha woyite doogaanchu isi hasiꞌrinowa higge hadhannota hogowu markaawe afiꞌrannohu manna xaꞌmisiiseeti; hakkiinni manna hogobbannoro xaꞌmiꞌranno. (Soq. 21:2, 3) Mittu manchi giddino markaawe hasiꞌrino bayicho iillisha hooggusiro nafa, markaawe babbaxxino bayicho uurritanno woyite dirre shiqqi assitannosita wole markaawe hasiꞌra dandaanno.—Soq. 27:1-6.

Duucha woyite markaawe hadhannohu diru giddo boode yanna callaati; hattono markaawe mamoote kaꞌe mamoote iillitannoro fushshinoonni pirogiraame dino. Kuni ikkinohu, mito woyite ayyarete gari injaannokki daafiraati; qoleno haafa ammaꞌno harunsitannori markaawete laaqaano kaayyo layidheenna qinaannonsakkiha lawinsaro haꞌra hooggara dandiitanno. Lawishshaho, markaawete heellichuwa usurroonni siibba giddo mittete aana haraqeessu ofolliro woy baaru qaccera hiiqqaqqantino markaawe laꞌuro agurte hossanno. Markaawe laaqqannori ayyare dancha ikkituro haꞌra hanaffanno. Mittu doogaanchi giddanno markaawe afiꞌri gedensaanni baaru qacce mare markaawe kaꞌanno yanna kulla geeshsha agadhanno.

Layineli Kaseni yinannihu xaggete borreessaanchi togo yiino: “Roomu gashshooti doogaanchu malka noowa hasiꞌranni raataawannokki gede dancha qixxaawo qixxeessino. Roomu malka noohu Tayiberi Lagi laworaati. Konni lagi qooxeessira noohu Ostiya yinanni katamira, lowo biiro afiꞌrinohu jawu gudumaali no. Kuri biiro giddo batinye babbaxxitino malkanni kaꞌanno markaawe riqibbannote: Narbooni [xaa Faransaye], Karteeji [xaa Tuniiziya] . . . hattono wole katamma markaawera uminsa biiro noonsa. Konnira markaawe hasiꞌrannohu aye manchino haꞌranno katamma riqibbanno biiro xaꞌme hasiꞌrino mashalaqqe afiꞌra dandaanno.”

Baaru hodhishshi doogaanchu hedinowa rahe iillanno gede kaaꞌlannoha ikkirono, qarrano afiꞌrino. Lawishshaho, Phaawuloosi misiyoone ikke haꞌri yannara giddino markaawe haammata higge hiiqqaqqantino.—2 Qor. 11:25.