Aliidi Bisi Sokka

Muxxe Roduuwa:

Maganohonna mannaho noonke baxilli, ‘haꞌne, daga baalante giddonni manna rosaano assineemmo gedenna cuuꞌneemmo’ gede kakkayisannonke. (Mat. 28:19, 20; Maq. 12:28-31) Wolu qiniite balaxisiisanno baxilli lowo wolqa afiꞌrino. Hegere heeshsho aanno halaali widira hige dooino wodani noonsare loosoho kakkayisara dandaanno.—Soq. 13:48.

Alba, soqqanshote hasaawu bitima rosiisiꞌne hakkoye yaanna borro ela roorsineemmo. Xa kayinni manna hasaawisate dandoonke woyyeessiꞌrate sharrammeemmo. Insa baxissinonsa hajo daafira kayinse hasaawa hasiꞌneemmo. Tini insara noonke baxille leellishshanno. Mannu hasaawa baxannore kayinse hasaawate, hasaawa soorranna mitto mittonka mancho baxisannore afate seekkine heda hasiissannonke. Tini borro tenne assate kaaꞌlitannonkehu hiittoonniiti?

Tini biroshere baxille leellishatenna manna rosaano assate kaaꞌlitanno akatta kulannoha 12 roso afidhino. Mittu mittunku rosi, Qullaawu Maxaafi xagge aana xintaminoho; tini xagge Yesuusi woy umi xibbi diri Kiristaani soqqanshote yannara leellishino akata kultannote. Mixonke hasaawu bitima rosiisiꞌne hakkoye yaa ikkitukkinni, mannaho baxille leellisha dandiineemmo doogga hasiꞌrate. Mittu mittunku akati duuchunku gari soqqanshora kaaꞌlannoha ikkirono, mite akatta roorenkanni hasaawa hananfeemmo woyitira, manna wirro hasaawinseemmo woyitira, woy Qullaawa Maxaafa xiinxallinseemmo woyitira kaaꞌlitannonke gara laꞌneemmo.

Mitto mittonka roso xiinxallitinanni woyite, qooxeessiꞌnera manna hasaawissinanni yannara tenne akatta leellisha dandiitinanni gara seekkitine hedde. Yihowaranna mannaho nooꞌne baxilli lexxanno gede sharramme. Aye ogimmanni roore, manna rosaano assate loosi qinaannoꞌne gede kaaꞌlannoꞌnehu konne baxilleeti.

Kiꞌne ledo miilooꞌmine mitteenni loosa lowo geeshsha banxeemmo. (Sof. 3:9) Mannaho baxille leellishshinanninna rosaano assitinanni woyite Yihowa maassiꞌroꞌne!