Aliidi Bisi Soyino Sokka

Muxxe Roduuwa:

Yihowa soqqamaano ikkinoommo daafira, Qaalesi Qullaawa Maxaafa lowo geeshsha banxeemmo. Qullaawu Maxaafi xagge adda ikkitinota, kuni maxaafi dancha biddishsha kulannotanna Yihowa mannu ooso lowo geeshsha baxannota leellishino doogo ikkitinota ammanneemmo. (Faarso 119:105; Luqaasi 1:3; 1 Yohaannisi 4:19) Mannu Maganu Qaali giddo nooha muxxe halaale rosanno gede kaaꞌla lowo geeshsha hasiꞌneemmo. Konni daafira, “Qullaawu Maxaafi Xaggenni Ronseemmo Roso” yaannoha konne maxaafa qixxeessinoommo. Aanchine konni maxaafi daafira shiimare kulleemmoꞌne.

Konne maxaafa qixxeessinoonnihu roore anga qaaqquulle hendeeti. Ikkirono, kuni maxaafi Qullaawa Maxaafa roore afa hasiꞌrannoha jajjabba mannano kaaꞌlanno. Qoleno, Qullaawa Maxaafa qixxeessinoonnihu baalunku mannira ikkino daafira, konni maxaafi giddo kulloonni xagge xiinxallanke baalunku addu hagiirre afiꞌneemmo gede kaaꞌlitannonketi dihuluullissannote.

Kuni maxaafi, mannu ooso kalaqantu yannanni kayisse noota Qullaawu Maxaafi giddo noo xagge kulanno. Konni maxaafi giddo Qullaawu Maxaafi xagge leellanno garinni xawisate lowore assinoonni; qoleno dandaami deerrinni xagge yannate aante garinni worate woꞌnaalloonni.

Ikkollana, konni maxaafi giddo Qullaawu Maxaafi xagge kulle calla diagurroonni. Borronna misilla, Qullaawu Maxaafi xagge xabbe leeltannonke garinninna Qullaawu Maxaafi giddo kulloonni mannira macciishshantinonsa hedo ninkerano macciishshantannonke gede assanno garinni qixxeessinoonni.

Kuni maxaafi, Qullaawu Maxaafira kulloonnihu Yihowara hajajaminonna hajajaminokki manni daafira huwanteemmo gede kaaꞌlannonke. Qoleno insa xaggenni roso afiꞌneemmo gede jawaachishannonke. (Roomu Sokka 15:4; 1 Qorontoosi 10:6) Kuni maxaafi 14 gafa afiꞌrino. Mittu mittunku gafi hanafora, hakko gafinni maa ronseemmoro kultanno hedo no.

Ooso nooꞌneha ikkiro, insa ledo xagge nabbawanna xaggete ledo xaado afidhino misile daafira hasaawa dandiitinanni. Hakkiinni xagge xintantinoha Qullaawu Maxaafi gafa mitteenni nabbawa dandiitinanni. Qaaqqiꞌne Qullaawu Maxaafinni nabbabbinoonniri konni maxaafi giddo noo rosi ledo xaado afiꞌrino gara huwatanno gede kaaꞌlesi. Jajjabbu mannino Qullaawu Maxaafita qara sokka huwatanno gede kaaꞌlate hatto assa dandiinanni.

Kuni maxaafi suwashshu wodani noonsa manni baalu, yaano ajuno akkaluno, Maganu Qaale rosannonna rosinori ledo sumuu yaanno garinni heeꞌranno gede kaaꞌlansara halchineemmo. Hatto ikkiro, insano Maganu baxannori ledo isira soqqama dandiitanno.