Yesuusa Amandi

Yesuusinna soqqamaasinesi Qedirooni Lagi widoonni higge Ejedhete Ilaala hadhino. Hatti yanna hashshu taalooteeti; hakko barra aganu dukkaadure no. Geetesemaani yinanni bayicho iillituta, Yesuusi ‘Goxxinikkinni kowiicho agarre’ yiinsa. Hakkiinni Yesuusi insawiinni shiima geeshsha xeertiꞌre kaashshu giddora eꞌꞌe guluphi. Isi lowo geeshsha yaade, “Ate hedo gede ikkona” yee Yihowa huucciꞌri. Hakkiinni Yihowa, Yesuusa jawaachishannosi gede sokkaasincho soyino. Yesuusi soqqamaasinesiwa higanno woyite, insa goxxe no. Isi togo yiinsa: ‘Tini gonxanni yanna diꞌꞌikkitinona kaꞌe. Baarigaarraꞌya angara sayinse uyinannie saate iillitino.’

Hakkawoyintenni Yihuda bisenna dulla adhino manni ledo dayi. Yihuda, Yesuusi mama nooro afino; korkaatuno isi duucha hige Yesuusi ledo hattee kaashshu basewa marino. Yihuda olantote ‘Yesuusi hiikkoyetiro ani kuleemmoꞌne’ yiinonsa. Hakko garinni isi Yesuusiwa mare, ‘Rosiisaancho, keere nootto?’ yee sunqisi. Yesuusi ‘Yihuda, sunqitanni noottoehu sayisse hirattoeraati?’ yiisi.

Yesuusi amadasira dayino manniwa shiqqi yee ‘Aye hasidhinoonni?’ yee xaꞌminsa. Insano “Naazireetete Yesuusa” yitu. Hakkiinni Yesuusi ‘Naazireetete Yesuusi aneeti’ yiinsa; insa kayinni badhe higge gatantarte ubbu. Yesuusi xaano ‘Aye hasidhinoonni’ yee xaꞌminsa. Insano “Naazireetete Yesuusa” yitu. Isino ‘Naazireetete Yesuusi aneeti yoommoꞌnewe. Rosaanoꞌya hadhona agurre’ yii.

Pheexiroosi tenne laiti, bise fushshe Malkoosi yinanni manchi macca muri; Malkoosi kakkalaanote roorrichi borojjichooti. Yesuusi kayinni manchu macca amade hursi. Hakkiinni Yesuusi Pheexiroosi ‘Bise fushshiꞌrattoha ikkiro, bisetenni reyatto. Konni daafira, bisekki kawiinni hooli’ yii. Olanto Yesuusa amadde angasi usurtu; hakkiinni Yesuusi soqqamaasine xooqqe baꞌino. Mannu Yesuusa Haanna yinannihu kakkalaanote roorrichiwa haaꞌre massi. Haanna Yesuusa duucha xaꞌmo xaꞌme kae, Qeyaafa yinannihu Kakkalaanote Biiliwa soyi. Yesuusi soqqamaasine ma ikkituyya?