Yesuusi Rosaanosira Huuccatto Assidhanno Gara Rosiisino

Farisootu baalanka coye assitannohu mannaho leellamate yiteeti. Insa dancha coye assitannohu mannu afara yiteeti. Insa laꞌnansara yite lowo manni noowa huuccatto assidhanno. Farisootu mannu macciishshansara xaadu minenna dooggate qaccera uurrite yitinota yitanni seeda huuccatto assidhanno. Konni daafira Yesuusi, ‘Huuccidhinanni woyite Farisootu gede ikkitinoonte’ yiita mannu dhagge assiꞌrino. Insa lowore coyidhino daafira calla Maganu macciishshannoha lawannonsa; kayinni isi togoo huuccatto dimacciishshanno. Huuccatto Yihowanna ati hasaabbinanni hasaawaati. Huucciꞌratto woyite yoottota calla yitooti. Yihowa giddokki hedo kulattosira hasiꞌranno.

‘Togo yitine huuccidhe: “Iima heeꞌratto Annanke, suꞌmikki qullaawa ikko. Mangistekki daggo. Fajjokki iima ikkitinonte gede uullate aanano ikkito.”’ Qoleno Yesuusi ‘Barru sagale aannoꞌne gede, cubboꞌne gatona yaannoꞌne gedenna wolere hasiisannoꞌnere aannoꞌne gede Magano huuccidhe’ yee rosiisino.

Yesuusi togo yiino: ‘Huucciꞌra agurtinoonte. Annaꞌne Yihowa danchare aannoꞌne gede huuccidhe. Annunna ama qaaqqinsara danchare aa baxanno. Kiꞌne qaaqqiꞌne tima huucciꞌriro kincho uyitinannini? Qulxuꞌme huucciꞌreenna hamashsho uyitinannini?’

Hakkiinni Yesuusi rosiisino roso togo yee xawisino: ‘Kiꞌne oosoꞌnera danchare aa egentinina, Anniꞌne Yihowa roorenka qullaawa ayyaana hiitto aa hooganno?’ Ati Yesuusi yiino garinni huucciꞌratto? Ati maricho afiꞌrate huucciꞌratto?