Yesuusi Buichonniwa Xaadino Mancho

Faasiku ayyaani gedensaanni, Yesuusinna rosaanosi Samaariyu widoonni higge galagalte Galiila hadhu. Siikaari yinanni katami mule, Yesuusi Yaiqoobi buicho yinanni bayicho iilli. Isi hakko fooliishshiꞌre heeꞌreenna, rosaanosi sagale hirtara katama hadhu.

Hakko mereero mitte mancho waa dirridhara hatte buichowa daggu. Yesuusi ise “Ageemmo waa uue” yiise. Ise togo yite qoltusi: ‘Ati ane mayira coyishiishshanni noottoe? Ani Samaariyu manchooti. Ayihudete manni Samaariyu manna dicoyishshiishanno.’ Yesuusi togo yiise: ‘Ani ayetiro afoottaro, “Ageemma waa uyie” yite huucciꞌrattae; anino heeshshote waa eemmohehu baino.’ Mancho qolte, ‘Mayitanni nootto? Waa dirriꞌnanni uduunnichi nafa dinohewe’ yitusi. Yesuusi manchote, ‘Ani eemmo waa agannohu layinkimeeshsho digooꞌranno’ yiise. Manchono, ‘Mootichaꞌya, hakkonne waa uyie’ yitu.

Yesuusi manchote, ‘Marte minaannakki woshshite amo’ yiise. Iseno, ‘Minaanni dinoe’ yitu. Yesuusi togo yiise: ‘Halaale yootta. Ontu mannira assiꞌrootta. Xa ledokki noohu kayinni minaannakki diꞌꞌikkino.’ Manchono Yesuusira togo yitu: ‘Ati masaalaancho ikkoottota xa afoomma. Annuwanke konni ilaali aana magansidhino; Ayihude kayinni Magano magansiꞌra hasiissanno dargi Yerusaalamete yitanno. Kiristoosa yinannihu Mesihichu daannota afoomma; isi dayiro, Magano magansiꞌnanni gara kulannonke.’ Hakkiinni Yesuusi, ‘Ani Mesihichaho’ yee wolu mannira kulinokkire kulise.

Hakkiinni mancho rakke katama hadhe, Samaariyu mannira togo yitu: ‘Loosoommare baala kulinoe mancho laꞌinannina amme! Isi Mesihichaho lawinohe.’ Hakkiinni insa manchote ledo buichonniwa marte, Yesuusi rosiisanna macciishshitu.

Samaariyu manni Yesuusi hakko katamira insa ledo keeshshanno gede huucciꞌri. Yesuusi lame barra woꞌma hakko rosiisino; konnira lowo manni iso ammani. Insa Samaariyu manchora togo yitu: ‘Kuni manchi coyiꞌrinore macciishshinummo gedensaanni, isi addinta alamete gatisaancho ikkinota buunxoommo.’