Daawuloosi Yesuusa Fonqoli

Yesuusi cuuami gedensaanni, qullaawu ayyaani halallira haaꞌre haꞌrinosi. Isi hakkiicho 40 barra woꞌma sagale itinokki daafira, lowo geeshsha hudiꞌrino. Hakkiinni Daawuloosi Yesuusa fonqolara dayi; Daawuloosi togo yii: ‘Hanni ati Maganu Beettootiro, tini kinna tima ikkitanno gede hajaji.’ Yesuusi kayinni Qullaawu Maxaafi giddonni togo yee qolisi: ‘Mannu heeꞌrannohu sagaletenni calla diꞌꞌikkino yine borreessinoonni. Yihowa kulannore baala macciishsha hasiissanno.’

Hakkiinni Daawuloosi Yesuusa togo yee fonqoli: ‘Hanni ati Maganu Beettootiro, qullaawu mini guunxonni kubbi. Maganu, anga woroonni worte kayissannohe gede sokkaasinesi soyanno yine borreessinoonni.’ Yesuusi kayinni xaano Qullaawu Maxaafi giddonni togo yee qoli: ‘Yihowa Maganokki fonqoltooti yine borreessinoonni.’

Hakkiinni Daawuloosi Yesuusira alamete gashshoote, jironna ayirrinye leellishisi gedensaanni togo yiisi: ‘Mitte higge anera kumbuulittoero, konne baala gashshootenna ayirrinye eemmohe.’ Yesuusi kayinni togo yee qolino: ‘Koo Sheexaane, anewiinni fafi! Yihowara calla kumbuuli yine borreessinoonni.’

Hakkiinni Sheexaanu agure haꞌri; hakkunni gedensaanni sokkaasine Yesuusiwa dagge sagale uyitinosi. Hatte yannanni kayise Yesuusi Maganu Mangisteha dancha duduwo duduwino. Maganu iso uullara soyinohu konne looso loosaraati. Mannu Yesuusi rosiisinonsare baxino; hattono insa isi haꞌriwa baalawa hadhino.