Aliidi Bisi Soyino Sokka

Muxxe Roduuwanke:

Arfaasa 1, 2008te mannaho ellannite Agarooshshu Shaera, “Ammanatenni Insa Faale Hadhe” yaannohu kaajju birxichi aante aantete fulannota kulloonni. Hakkuyinku, sasu agani giddo mitte hinge konni birxichi hunda hagiirsiisanno roso fushshinanni keeshshinoonni.

Aante aantete fulannoha konne roso nabbawino manni mayinoyya? Mitte mancho Maarta xagge nabbabbe gudduhu gedensaanni, togo yite borreessitino: “Anino ise gede ikkeemma daafira, nabbawumma woyite osoꞌloomma; woꞌmanka woyite manna seekke wosinsiꞌrate yee anga mitiiꞌmeemma daafira, agure jaallaꞌya ledo ofolle hasaawa hasiissannoeta deꞌꞌeemma woyiti no.” Mitte wedellitteno Asteeri xagge nabbabbe kaꞌe, togo yite kaajja hedo coyidhino: “Uddiꞌneemmo uduunniranna haarote daggino faashinera quwa saꞌnammora dandiineemmo. Hige seesanke bunshe diafidhino; ikkirono quwa saꞌꞌa dihasiissannonke.” Ise ledde togo yitino: “Yihowa laꞌꞌannohu giddiidi ayimmankeeti.” Mitte rodoo soqqamaasinchu Pheexiroosi xagge nabbabbuhu gedensaanni, dhagge assidhe togo yitino: “Tenne xagge nabbawumma woyite, xaggete giddora gudisame eꞌꞌe aguroomma. Ani umiꞌya hakko noommaha lawinoe! Xaggete giddo kulloonniri baalu illete laꞌꞌanni noommahu gede ikke leellinoe.”

Kurinna tenne birxichuwa daafira galatansa borreesse soyinohu wolu batinyu manni yiinori, lowo diri albaanni soqqamaasinchu Phaawuloosi borreessinori halaale ikkinota buuxisanno; isi togo yiino: “Umo assine Qullaawa Maxaaffa giddo borreessinoonnire baala rosiisankera borreessinoonni.” (Rom. 15:4) Addanko, Yihowa togoo xagge Qullaawu Maxaafi giddo borreessine worranni gede assinohu kaajja roso rosiisankera yeeti. Halaalu mine keeshshinoommo diri ikki geeshshihano ikkiro, ninke baalunku Qullaawu Maxaafi xaggenni lowore ronseemmo.

Dandaamiꞌne deerrinni, konne maxaafa bayichonko nabbabbinanni gede jawaachinsheemmoꞌne. Maatete Magansiꞌraꞌne yannarano xiinxalle; oosoꞌne konne maxaafa lowo geeshsha baxxannota dihuluullammeemmo! Konne maxaafa Songonnite Qullaawu Maxaafi Xiinxallora xiinxallinanni woyiteno, gambooshshe mitte lamalano hossinoonte! Muddantinikkinni wodanaaꞌmitine nabbabbe. Nabbabbinanni heedhinoonnire hedate woꞌnaalle. Qullaawu Maxaafi xagge giddo kulloonni manni hedo huwatatenna insa laꞌannore laꞌꞌate woꞌnaalle. Insara iillinori kiꞌnera iilloommero hiitto ikkitinara dandiitinanniro hedde.

Kuni maxaafi fulino daafira lowo geeshsha hagiidhinoommo. Kuni maxaafi kiꞌnerano maateꞌnerano elto ikkara halchineemmo. Baxillinkenna keerinke iilloꞌne.

Yihowa Farciꞌraasinehu Aliidi Bisi