Borronke Qixxeessinannihunna Wolu Afiira Qolle Tirrannihu Hiittoonniiti?

“Daga baalate, gaꞌre baalatenna manna baalaho” “dancha duduwo” seekkine duduwate, mito 750 saꞌꞌanno afiinni borro qixxeessinanni heeꞌnoommo. (Ajuuja 14:6) Konne lowo looso loonseemmohu hiittoonniiti? Konne assate addi addi gobbara heedhe borro borreessitannorinna tirote looso diinaggaabbe loossannori lowore kaaꞌlitinonke. Kuri baalunku Yihowa Farciꞌraasineeti.

Borro umo qixxaabbannohu Ingilizete afiinniiti. Aliidi Bisi qara biirora nooti Borro Qixxeessitanno Kifile loossanno looso massaganno. Tini kifile qara biiroranna mite mite sinu biirora heedhe borro borreessitannori loossanno looso qineessitanno. Borreessaanonke addi addi dagoomi giddo heedhannorenna babbaxxino budi noonsare ikkansa, alamete doyichora nooha addi addi budi noonsa manna baxissanno borro qixxeessate kaaꞌlitinonke.

Qixxaabbino borro addi addite tirote gaamora sonkanni. Borro haaro ikkine buunxinna fultara fajjini gedensaanni, alame woꞌmate nootera tirote gaamora kompiyuteretenni sonkanni; insa borro tirtanno, hattono Ingilizete afii borro ledo heewisiisse laꞌanno, qolteno soꞌro nooro buuxate nabbabbanno. Tirote looso loossannori, Ingilizete afii borrora noo hedo gudisse sayissannota, hattono “gara ikkitinota halaalu qaalla” horoonsiꞌrate woꞌnaaltanno.—Mekibibi 12:10.

Kompiyutere loosu anga iima loosamanno gede kaaꞌlitanno. Kompiyutere mannu gede borro diqixxeessitanno, hattono wolu afiira qolte ditirtanno. Ikkollana, kompiyuterete aana noo dikishineerubba, hattono wole pirogiraame tirote gaamo loosonsa ollokke guddanno gede kaaꞌlitannonsa. Yihowa Farciꞌraasine, Malti-laanguweji Elekitirooniki Pabilishingi Sistemi (MEPS) yinannita kompiyuterete pirogiraame qixxeessitino; tini pirogiraame borro addi addi afiinni borreessine, hattono misilla bayicho bayichonsa worre attamate qixxeessinanni gede kaaꞌlitanno.

Shiima kume ikkanno manni coyiꞌranno afii nafa gatikki, batinyu afiinni borro qixxeessate togo daafurreemmohu mayiraati? Korkaatuno Yihowa, “duuchunku gari manni gatanno gede, hattono halaalunnita gara ikkitino egenno afiˈranno gede” hasiꞌranno daafiraati.—1 Ximootewosi 2:3, 4.

• Borronke umo qixxaabbannohu hiittoonniiti?

• Borronke batinyu afiira qolle tirreemmohu mayiraati?