Yesuusi Ilaminohu Sadaasu Aganiraati?

QULLAAWU MAXAAFI Yesuusi ilamino barra dikulanno. Ikkeennano, Yesuusi ilaminohu Sadaasu aganira diꞌꞌikkino yineemmo gede assitannonke taje kulannonke.

Yesuusi ilamino katamira yaano Beeteleemete Sadaasu aganira ayyare hiittootero hanni laꞌno. Kaaseelu yinannihu Yihudootu agani (xaa yannara Bocaasa/Sadaasa yinannihu) qorru uwannohonna xeenu batiꞌranno aganaati. Hakkiinni aane noo agani Tebeeti (Sadaasa/Arfaasa) yinanniho. Diru giddo kuni agani lowo geeshsha qiidadoho; qoleno ilaallate qooxora saꞌe saꞌe kaade ubbanno aganaati. Qullaawu Maxaafi Beeteleemete qooxeessira ayyarete gari hiittooho yaannoro hanni laꞌno.

Qullaawu Maxaafi borreessaanchi Izira, Kaaseelu yinanni agani qiidadonna xeenu batiꞌrannoha ikkinota xawisino. Izira “honsikki aganira [yaano Kaaseelu aganira] lemiikki barra” lowo manni Yerusaalamete gamba yiinota kuli gedensaanni, hakku manni ‘xeenu batinynyinni . . . huxirinota’ xawisino. Hatte yannara nooha ayyarete gara lainohunni gamba yiino manni umisi togo yiino: “Tini yanna xeenu batiꞌrinote; konnira gobba uurra didandiineemmo.” (Izira 10:9, 13; Ermiyaasi 36:22) Sadaasu aganira Beeteleemete qooxeessira noo allaalaasine saadansa hawarro yannantenni minira eessidhannoti mittore dihuluullissanno!

Ikkollana Yesuusi ilami hashsha allaalaasine saadansa gobba allaaꞌlitanni noota Qullaawu Maxaafi xawisanno. Isinni Qullaawu Maxaafi borreessaanchi Luqaasi, hatte yannara Beeteleemete qooxeessira ‘allaalaasine hashsha saada agadhitanni galtannota’ xawisino. (Luqaasi 2:8-12) Hakkawaro allaalaasine saadansa hashsha agadhitanni galtannota wodanchi. Tini allaalaasine qorru uwannohuranna xeenu batiꞌranno aganira yaano Sadaasaho gobba gala dandiitanno? Didandiitanno. Konni daafira Yesuusi ilami yannara noo ikkito, isi Sadaasu aganira ilaminokkita leellishshanno.a

Maganu Qaali Yesuusi reyino yanna xawise kulanno; ikkollana isi ilamino yanna afa dandiineemmo gede kaaꞌlannonkere shiimarella kulanno. Tini qolte Nugusu Salamooni yiino yaatto qaangeemmo gede assitannonke. Isi togo yiino: “Dancha shittonni suꞌmu rooreho; qoleno ilamate barrinni reyote barri rooreho.” (Mekibibi 7:1) Konni daafira, Qullaawu Maxaafi Yesuusi soqqanshorenna reyosire lowore kule, ilamino barrire kayinni shiimare calla kulasi xaggeeffantannita diꞌꞌikkitino.