Sokkaanote Sooreessi Mikaeeli Ayeeti?

AYYAANU kalaqo ikkinoha Mikaeeli, Qullaawu Maxaafi giddo shiima baseralla qummi assinoonni. Ikkollana qummi assinoonni basera assinoreno xawinsoonni. Daanieeli maxaafira, Mikaeeli busha sokkaano ledo olaminota, Yihudu sokkara, Sheexaanu ledo yekkeeraminotanna Ajuujate maxaafira kayinni Daawuloosinna agaanintesi ledo olaminota xawinsoonni. Mikaeeli Yihowate gashshate mabtera haꞌlino, hattono Yihowa diinna ledo gaaramino; tenne assasinni, “Maganu Gedeehu Ayi No?” yitannote suꞌmisi tiro garinni heeꞌrino. Ikkina Mikaeeli ayeeti?

Mito wote mannu babbaxxino suꞌminni woshshamanno. Lawishshaho, Yaaqoobihu wolu suꞌmi Isiraeeliiti. Pheexiroosi Simiooni yinanni suꞌminnino woshshamino. (Kalaqo 49:1, 2; Maatewoosi 10:2) Hatteente gede, Yesuusi Kiristoosi uullara daara albaannino ikko iimira haꞌri gedensaanni Mikaeeli yaamame woshshamannota Qullaawu Maxaafi xawisanno. Hanni hatto yineemmo gede assitannonke xiqissa laꞌno.

Sokkaanote Sooreessa. Maganu Qaali Mikaeeli, “sokkaanote [sooreessa]” yaanno. (Yihudi 9) Qullaawu Maxaafi giddo “sooreessa” yaanno qaale duuchcha kiiro afiꞌrino gede assine dixawinsoonni. Kunino sooreessaho yinoonnihu mitto sokkaancho calla ikkinota buuxisanno. Hakkiinni saeno Yesuusa sokkaanote sooreessaati yine xawinsoonni. Reyotenni kainoha Mootichcha Yesuusi Kiristoosi lainohunni 1 Teselonqe 4:16 togo yitanno: ‘Mootichchu umisi hajajote qoonqonninna sokkaanote sooreessi qoonqonni iiminni dirranno.’ Koye Yesuusi qoonqo sokkaanote sooreessi qoonqooti yinoonni. Konni daafira tini xiqise sokkaanote sooreessi Mikaeeli Yesuusa umosi ikkinota xawissanno.

Olantote Sooreessa. Qullaawu Maxaafi, ‘Mikaeelinna sokkaanosi dhudhuufunna sokkaanosi ledo olantinota’ kulanno. (Ajuu[j]a 12:7) Konni daafira Mikaeeli ammanantino sokkaano olantora Sooreessaho yaate. Ajuujate maxaafi Yesuusano ammanantino sokkaano olantora Sooreessa ikkinota kulanno. (Ajuu[j]a 19:14-16) Qoleno hawaariya Phaawuloosi “Mootichcha Yesuusa” nna “[wolqaataamma] sokkaanosi” babbade kulino. (2 Teselonqe 1:7) Konni daafira, Qullaawu Maxaafi Mikaeelinna ‘sokkaanosire’ hattono Yesuusinna ‘sokkaanosire’ kulanno. (Maatewoosi 13:41; 16:27; 24:31; 1 Pheexiroosi 3:22) Ikkeennano Maganu Qaali iima ammanantino sokkaano amaddinoti lame olantote gaamo yaano mitte Mikaeeli marraꞌꞌannoti wole qolte Yesuusi marraꞌꞌanno gaamo no diyaanno. Konni daafira, Mikaeeli Yesuusi Kiristoosi umosiiti yaate. Kuni suꞌmi Yesuusi iima loosanno loosi ledo xaado afiꞌrinoho.a