Yesuusi Ilaalaho Ofolle Rosiisi

LAI Yesuusi koye ofolle no. Isi Galiila yinanniwa ilaalaho, konne manna baala rosiisanni no. Isiwa gamba yite ofoltinori rosaanosiiti. Insa giddo 12 hawaariyaatesi ikkitara doodhino. Hawaariyaate Yesuusira baxxitino rosaannooti. Ati suꞌmansa afootto?

Mittu Simiooni Pheexiroosiiti; wolu qole rodoosi Indiriyaasiiti. Hattono roduuwa ikkitinori Yaaqoobinna Yohaannisi no. Woluno Yaaqoobi yinanni rosaanchi no; mittu qole Simiooni yinanniho. Lame hawaariyaate suꞌmi Yihudaati. Mittu Asqoorootu Yihudaatinna wolu Yihudi kayinni Taadiyoosi yinanniho. Wolootu qolte, Filiphphoosinna Naatinaeeli (wolu suꞌmisi Bertelemewoosi) yinannireeti; Maatewoosinna Toomaasi yinannirino no.

Yesuusi Samaariyunni higi gedensaanni, ‘Iimi mangiste daggaraati’ yaanni farciꞌra hanafi. Hatti mangiste maatiro afootto? Umosi dandiino Maganu gashshooteeti. Tenne mangiste nugusi Yesuusaati. Isi iima heeꞌre gashshanno; qoleno uullate keere abbanno. Maganu mangiste woꞌma uulla biifado gannate assitanno.

Yesuusi koye mangistennire mannaho rosiisanni no. Togo yee kulanni noonsa: ‘Togo yitine huuccidhe: Iima heeꞌratto Annanke, suꞌmikki maassamo. Mangistekki daggo. Fajjokki iima ikkitanni noonte gede, uullano ikkito.’ Duuchchu manni tenne huuccatto ‘Mootichchu Huuccattooti’ yaanno. Wolu manni qole, ‘Abbaataachchinote’ yaanno. Ati tenne huuccatto gudisse assite afatto?

Yesuusi mannootu mimmitu ledo hiitto ikkite heeꞌra hasiissannonsarono rosiisanni no. Togo yiinsa: ‘Mannu assaꞌnera hasidhinannire kiꞌneno assensa.’ Atera mannu danchare assannohe wote tashshi diyaannohe? Konni daafira Yesuusi hatto yiinohu, ninkeno wolu mannira danchare assa hasiissannonketa rosiisateeti. Baalunku manni hatto assanno yannara gannate ikkitanno uullara heeꞌra hagiirsiissannota diꞌꞌikkitanno?