Yesuusi Hadiro Ilami

KUNI danqu qaaqqi ayeetiro afootto? Eewa, Yesuusaati. Isi hadiro ilame kaino. Hadiru saada galtanno bayichchooti. Maariyaami iso harretenna wole saadara hayisso worranni daallasira goxisse no. Maariyaaminna Yooseefi kowiichchira saadate giddora mayira daggino? Kuni ooso illanni bayichcho ikkinoni?

Deeꞌni, diꞌꞌikkino. Ikkollana insa konni bayichchira dagginohu mayiraatiro hanni laꞌno. Roomu gashshaanchi Qeesaari Awugisxoosi, mittu mittunku manchi ilamino katama daye suꞌmasi borreessamanno gede hajajo fushshi. Yooseefi ilaminohu koye Beeteleemeteeti. Ikkollana isinna Maariyaami martu wote fooliishshidhanno mine hooggu. Konni daafira lamunku kawiira saada noowa daggu. Hakko barranni Maariyaami Yesuusi iltu! Koye misilete aana laꞌꞌattonte gede isi kayinni mittore diꞌꞌikkino.

Yesuusa laꞌara dagganni noo allaalaasine laitto? Insa hashsha gereewonsa agadhitanni xawoho no; hakko heedheenna, lowo xawaabbi qooxeessinsara xawi. Sokkaanchu daanni no! Allaalaasine lowo geeshsha waajjitu. Sokkaanchu kayinni togo yiinsa: ‘Waajjitinoonte! Dancha duduwo kulammoꞌnera dawoommo. Techcho Beeteleemete Mootichchu Kiristoosi ilamino. Isi manna gatisannoho! Uddano dimbeenna saadate hayisso worranni daallasira goxe noona affinannina.’ Hedeweelchono lowo sokkaano dagge Magano galattu. Hakkawotenni allaalaasine Yesuusa laꞌara jawaatte hadhu; xa marte kuneeti laꞌanni no.

Yesuusi lowo geeshsha baxxinoha ikkinohu mayiraatiro afootto? Isi addinta ayeetiro afootto? Konni maxaafira umi fooliishsho giddo Maganunnihu bayiru Beetti ayeetiro ronsoommota qaagi. Kuni Beetti iimanna uulla, qoleno wole baalare kalaqatenni Yihowa ledo loosino. Yesuusa yinannihu isooti!

Yihowa Beettisi heeshsho iiminni haare Maariyaami godowira wori. Wolu qaaqquulli amuwinsa godowira lophphannonte gede hakkawotenni mittu qaaqqi Maariyaami godowi giddo lophpha hanafi. Kuni qaaqqi kayinni Maganu Beettooti. Gedensaannino Yesuusi Beeteleemete koye hadiro ilami. Sokkaano Yesuusi ilaminota mannaho kulansanni mayira hagiidhitinoro xa afitto?