Yesuusi Ilamanni Kayise Reyosi Geeshsha

Gabirieeli yinanni sokkaancho Maariyaami yinannitewa xuma beettowa sonkoonni. Isino Maariyaami qaaqqo iltannotanna hakku qaaqqino hegerera moohannota kulise. Yesuusi hadiro ilamino; ilaminowa allaalaasine dagge laꞌusi. Gedensaannino mitte beeddakko Soojjaatinni manna massagge konni qaaqqiwa abbitu. Konni mannira hatte beeddakko leellishinohu ayeetironna, Yesuusi shinasira gannoonni ganonni gatinohu hiittoonniitiro albaange ronseemmo.

Hakkiinni aanchine, Yesuusi 12 diro ikkisita Maganu mine mare rosiisaanote ledo hasaawinota ronseemmo. Kuni ikkihunni tonaasettu diri gedensaanni Yesuusi cuuami. Hakkiinnino Maganu mangistere farciꞌranna rosiisa hanafi; Maganu Yesuusa uullara soyinohu konne looso loosaraati. Yesuusi konne looso kaaꞌlannosi gede 12 manna doore hawaariyaatesi assiri.

Yesuusi lowo maalaleno assino. Kumunni kiirranni manna shiima qulxuꞌmenna shiima tima itise duushshino. Xiwantinore hursino; reyitinore nafa kayisino. Gedensaannino, Yesuusira heeshshosi goofimarchira iillinosiha duuchcha qarranna shinisi gara ronseemmo. Yesuusi sase dironna darate ikkitanno yanna Maganu mangistere farciꞌrino; konni daafira LEEKKI GAFI 34 diro saꞌanno yanna giddo ikkitino xagge amadino.