Daawiti Mine Qarru Kalaqami

DAAWITI Yerusaalamete heeꞌre gashsha hanafi gedensaanni, Yihowa Daawiti wottaaddarira diinnansa aana lowo qeelle uyinsa. Yihowa Kanaꞌꞌaani gobba Isiraeelete mannira aara qaale eino. Hakkiinnino Yihowa kaaꞌlonni, isi aansara qaale eino gobba baalanti gedensaanni insata ikkitu.

Daawiti dancha nugusaati. Isi Yihowa baxanno. Konni daafira Yerusaalamete katama amadanni heeꞌrenni, Yihowaha gondooru taawoota hakkiira abbi. Qoleno gondooru taawoota worranniha Maganu mine minara hasiꞌrino.

Daawiti jawa ikkiti mitte bunshe assi. Daawiti manniha ikkinore adha soꞌro ikkitinota afino. Ikkollana mitto barra hawarro, gashshootu minisira heeꞌre, woroonni noota mitte xuma mancho lai. Manchote suꞌmi Bersaabehiiti; ayiddaannise Ooriyo yinanniho; isino Daawiti wottaaddarchooti.

Daawiti Bersaabehi ledo goxara lowo geeshsha hasiꞌrino daafira, Bersaabehi isi noowa gashshootu minira dagganno gede assi. Ayiddaannise olu basera olamanni no. Daawiti Bersaabehi ledo siimu xaadooshshe assi; iseno godobbu. Daawiti lowo geeshsha yaadi; konni daafira Ooriyo reyanno gede olaho xaawate worara wottaaddarisi roorrichchiwa Iyyoaabiwa sokka soyi. Ooriyo reyita, Daawiti Bersaabehi galtesi ikkitara adhi.

Yihowa Daawitira lowo geeshsha hanqi. Konni daafira, Yihowa soqqamaanchosi Naataani Daawitira cubbosi kulasira soyi. Kuneeti Naataani Daawitira cubbosi kulanna lai. Daawiti loosino cubbira lowo geeshsha gaabbino daafira, Yihowa diqoominosi. Ikkollana Yihowa, ‘Konne busha coye assootto daafira, minikki giddo lowo qarri kalaqamanno’ yiisi. Hakkiinnino Daawitira lowo qarri iillisi!

Umo, Bersaabehi iltu qaaqqi reyi. Hakkiinnino Daawitihu bayiru beetti Aminooni meya rodoosi Tiꞌꞌimaari bushiishi. Daawiti beetti Abeseloomi tennera lowo geeshsha hanqe Aminooni shii. Gedensaannino Abeseloomi haammatu manni baxisi; Abeseloomino isonooto nugusa asse moohi. Goofimarchoho isi Daawiti ledo qasameenna Daawiti qeelita reyi. Eewanni Daawitira lowo qarri iillinosi.

Kuni duuchchunku ikki yannara, Bersaabehi Salamooni iltu. Daawiti geedhitanna xiwamita, beettisi Adooniyaasi isonooto nugusa assara woꞌnaali. Hakkiinnino Daawiti, Salamooni albaage nugusa ikkannota leellishate, kakkalaanchu Saadooqi Salamooni umira zayite dunanno gede assi. Hakkunni gedensaanni Daawiti 70 dirisinni reyi. Isi 40 diro moohino; xa kayinni Isiraeelete nugusi Salamooni ikki.