Mannu Lowo Gimbe Mini

NOHINNA maatesi markaawete fultuhunni kayise lowo diri sai. Nohiti labballu ooso lowo ooso iltu. Qolteno oosonsa lophphite ooso iltu. Mulenni mannu uullate aana batiꞌri.

Konni manni giddo Naamiruudi yinannihu, Nohi awura ikkannohu mittu manchi no. Kuni manchi saadano mannano ugaaxe shaanno daafira busha manchooti. Qoleno Naamiruudi isonooto wolu mannira mootichcha assino. Maganu Naamiruudi dibaxanno.

Hatte yannara noo manni baalunku mittu qaalinni coyiꞌranno. Naamiruudi mannu baalu mitteenni heeꞌranno gede assate hasiꞌri; togo assinohuno duuchchanka gashshate yeeti. Gashshate yee maa assinoro afitto? Mannu katama minanno gedenna hakko katamirano lowo gimbe loosanno gede kuli. Kunee mannu xuube loosanna misilete aana lai.

Maganu Yihowa konni assootinsanni dihagiidhino. Maganu, mannu uullate aana duuchchankawa heeꞌranno gede hasiꞌrino. Mannootu kayinni togo yitu: ‘Amme! Katamanna hojja gordo iillitanno gimbe miꞌninona. Hakkiinnino maccare ikkineemmona!’ Kuriuu mannooti ayirrinynye Maganoho ikkikkinni uminsara hasidhino.

Konni daafira Maganu mannootu gimbe mintannota hooli. Hiitto asse hoolinoro afootto? Mannootu hedeweelcho mitto qaale agurte babbaxxino qaalinni coyidhanno gede asseeti. Hakkawotenni kuꞌu yaanoti kuꞌuyira leella gibbu. Iseraati katamansa Baabeeli, woyi Baabilooni yinoonnihu; hatto yaano “Burduuqoho” yaate.

Mannootuno Baabeelinni fulte billaallitu. Mittu gari qaale coyiꞌranno manni, gaamo gaamo ikke addi addi gobbara heeꞌrara billaalli.